Президент Қасым-Жомарт Тоқаевтың төрағалығымен өтіп жатқан Үкіметтің кеңейтілген отырысында жаңа Салық кодексін тиімді іске асыру мәселесі көтерілді. Мемлекет басшысы салық-бюджет саясаты теңгерімді болып, экономиканың орнықты дамуына және халықтың әл-ауқатын арттыруға бағытталуы тиіс екенін айтты, деп хабарлайды QazMonitor.
Президенттің айтуынша, биыл күшіне енген Салық кодексі экономикадағы ашықтық пен тәртіпті күшейтуге ықпал етіп отыр. Экономика министрлігінің дерегіне сәйкес, өзін-өзі жұмыспен қамтыған азаматтарға арналған жаңа салық режимі іске қосылғаннан бері 180 мыңнан астам жаңа салық төлеуші заңды алаңға шыққан.
«Үкіметтің бағалауынша, салық реформасының нәтижесінде биыл бюджетке қосымша 4,4 триллион теңге түседі. Жоспар, әлбетте, көңілге сенім ұялатады», деді Президент.
Сонымен қатар Мемлекет басшысы жоспарлы көрсеткіштерге бизнеске шамадан тыс салық салу немесе заңсыз қысым көрсету есебінен жетуге болмайтынын атап өтті. Оның сөзінше, бюджетті толықтырудың негізгі тетігі - тиімді салықтық әкімшілендіру болуы керек.
Осыған байланысты Президент салық жүйесін жаппай цифрландыруды жедел бастау қажеттігін тапсырды.