Алматыда ҚР Экология және табиғи ресурстар министрлігі жергілікті атқарушы билікпен ауаның сапасын жақсарту шараларын талқылады деп хабарлайды QazMonitor.
2025 жылы «Қазгидромет» деректері бойынша Қазақстанның 11 қаласында ауа ластануы жоғары деңгейде тіркелді. Ең проблемалы қалалардың қатарында Алматы, Өскемен, Қарағанды, Теміртау, Ақтөбе бар. Алматыда шығарындылардың 60%-ы көлікке, ал 12%-дан астамы жеке үйлер мен шағын қазандықтарға тиесілі.
Министрлік өнеркәсіптік объектілерді жаңғыртып, ең үздік қолжетімді технологияларды енгізу жұмыстарын жүргізіп келеді. Сонымен бірге шағын көздерден шығарындыларды азайту үшін әкімдіктерге жаңа қағидаларды әзірлеу тапсырылды.
Қағидалар жобасына жеке секторды газдандыруды субсидиялау, қоғамдық тамақтандыру мен шағын қазандықтарда қатты отынды пайдалануға тыйым салу, орталықтандырылған жылумен жабдықтауға қосылуды ынталандыру, қоғамдық көлік пен таксиді электр немесе газға ауыстыру, «Жұп-Тақ күн» жүйесін енгізу және өнеркәсіптік аймақтар айналасына жасыл белдеулер құру сияқты негізгі шаралар енгізіледі.
Бұл шаралар ауа сапасын жақсартуға және тұрғындардың денсаулығын қорғауға ықпал етпек.