Астананың №3 көпбейінді қалалық балалар ауруханасында қызылша диагнозы қойылған балаларды емдеу жалғасуда, деп хабарлайды QazMonitor елорда әкімдігіне сілтеме жасап.
Аурухана директорының медициналық бөлім жөніндегі орынбасары Роза Өтегенованың айтуынша, қызылша жұқтырған пациенттер санының өсуі 2025 жылдың қазан айынан басталған, ал ауруханаға жатқызу көрсеткіші қараша-желтоқсан айларында ең жоғары шегіне жеткен.
2026 жылдың қаңтарынан бастап ауырғандар саны біртіндеп азайып келеді, бірақ жаңа жағдайлар әлі де тіркелуде. Қазіргі уақытта стационарда 50-ден астам бала емделіп жатыр, олардың басым бөлігі бес жасқа толмаған. Сондай-ақ, ауырғандардың арасында мектеп оқушылары мен студенттер де бар.
Қызылша вакцинамен басқарылатын инфекциялар қатарына жатады. Егер бала егілмеген болса, жұқтыру қаупі өте жоғары, ал асқынулары ауыр болып, бронхит, пневмония немесе басқа ағзалардың зақымдануына әкелуі мүмкін. Әсіресе, орталық жүйке жүйесіне тигізетін зардаптары өте қауіпті.
Қызылшаға қарсы алғашқы екпе балаларға бір жасында салынады. Бұл ретте қызылша және паротитке қарсы аралас вакцина қолданылады. Эпидемиологиялық жағдайға байланысты Бас мемлекеттік санитарлық дәрігердің алты айлық балалардан бастап қосымша иммундау жүргізу туралы қаулысы күшіне енді.
Дәрігерлер ата-аналарды вакцинациялауды кейінге қалдырмауға және аурудың асқынуы мен таралуын болдырмау үшін балаларды қауіпті инфекциялардан уақытылы қорғауға шақырады.