Елордада алдағы төрт жыл ішінде 11 медициналық нысанның құрылысы жоспарланып отыр, деп хабарлайды QazMonitor. Бұл туралы қалалық Денсаулық сақтау басқармасының 2025 жылдың қорытындысы бойынша алқа отырысында мәлім болды.
Бүгінде астанадағы медициналық ұйымдар айтарлықтай жүктемемен жұмыс істеуде. Қала халқының саны жыл сайын орта есеппен 100 мың адамға өсіп отырғандықтан, қолданыстағы денсаулық сақтау инфрақұрылымы шамадан тыс салмақ қабылдап отыр.
Үкімет бекіткен Бас жоспарға сәйкес, 2035 жылға қарай елорда халқының саны 2,3 миллион адамға жетеді деп болжанып отыр. Бұл толыққанды медициналық көмекке деген сұранысты арттыра түсуде.
Қандай нысандар салынады?
Жоспарға сәйкес, алдағы жылдары:
2 перинаталдық орталық
Заманауи көпсалалы жаңа аурухана
6 жаңа толыққанды емхана (оның ішінде 2-еуі мемлекеттік)
2 жедел медициналық жәрдем қосалқы станциясы
салынбақ.
Сондай-ақ биыл мамыр айында №2 Қалалық көпсалалы аурухана жанынан қабылдау-диагностикалық кешеннің құрылысы аяқталады. Бұл тек екі корпусты біріктіру емес, ірі флагмандық медициналық орталық құру жобасы болмақ.
Кешен құрамында:
көпфункционалды реанимация бөлімі;
кеңейтілген қарқынды терапия палаталары;
жоғары технологиялық диагностика және емдеу әдістері қарастырылған.
Айта кетейік, өткен жылы жағдайды жақсарту мақсатында «Нұрлы жол» ауданында ауысымына 350 адам қабылдайтын жеке емхана ашылған болатын. Ал биыл Ұлттық шұғыл медицинаны үйлестіру орталығы базасында Нұра және Есіл аудандарының балаларына арналған травматологиялық пункт іске қосылды.