ҚР Қазақстан Республикасы Ішкі істер министрлігі-нің аумақтық бөлімшелері автомектептердің қызметіне тексеріс жүргізді, деп хабарлайды QazMonitor.
Тексеру нәтижесінде бірқатар оқу орындарында автодромдардың талапқа сай еместігі анықталған: жол белгілері мен жол таңбаларының жеткіліксіздігі, жарықтандыру жүйесінің нашарлығы, сондай-ақ кейбір оқу көліктерінің техникалық ақаулары бар екені белгілі болды. Аталған кемшіліктерді жою үшін 20 ұйғарым берілді.
Сонымен қатар, жүргізушілерді даярлау барысында міндетті техникалық тексеруден өтпеген және сақтандыру полисі жоқ автокөліктерді пайдаланған 59 оқу ұйымы анықталған. Нәтижесінде ІІМ Әкімшілік полиция комитеті 701 оқу тобының қызметін тоқтатты.
Автомектептердің қызметі мен оқу топтарын тіркеу «Автомектеп» ақпараттық жүйесі арқылы жүзеге асырылады. Бұл жүйе онлайн режимде берілген жүргізуші куәліктерінің заңдылығын, оқу бағдарламаларын және оқу автокөліктерін бақылауға мүмкіндік береді.
Бақылауды күшейту мақсатында автомектептерді ашудың хабарлама тәртібінен рұқсат беру тәртібіне көшу және олардың қызметіне мемлекеттік бақылау енгізу қарастырылуда. Осыған байланысты тиісті түзетулерді қамтитын «Жол жүрісі туралы» заңға өзгерістер енгізу жөніндегі заң жобасы әзірленіп, қазіргі уақытта Парламент Мәжілісінде қаралып жатыр.
Айта кетейік, бүгінде елде 727 автомектеп жүргізушілерді даярлайды.