«Даму» кәсіпкерлікті дамыту қоры шалғай қалалар мен аудан орталықтарында бизнес үшін мемлекеттік қолдауға қол жеткізуді арттыру мақсатында мобильді фронт-офистерді іске қосады, деп хабарлайды QazMonitor.
Жобаның негізгі мақсаты – кәсіпкерлерге кеңес беру және жергілікті жерде өтінім қабылдау арқылы «Бәйтерек» холдингі ұсынатын мемлекеттік қолдау шаралары туралы өзекті ақпаратпен қамтамасыз ету.
Бастама аясында Қор консультанттары әкімдіктер, «Атамекен» ҰКП және екінші деңгейлі банктер өкілдерімен бірлесіп, шалғай өңірлерге барады. Мобильді топтар моноқалалар, аудан орталықтары мен ауылдарды қамтиды. Бұл әсіресе ауылдар мен шағын қалалардағы кәсіпкерлерді мемлекеттік қолдау құралдарына тартуға бағытталған «Іскер аймақ» өңірлік бағдарламасы шеңберінде маңызды. Бағдарлама жергілікті шикізатты өңдеу арқылы өңірлердің әлеуетін өндірістік қуатқа айналдыруға мүмкіндік береді.
Кәсіпкерлерге тек «Даму» қоры ғана емес, «Бәйтерек» холдингінің бірыңғай фронт-офисі арқылы оның еншілес ұйымдары – Қазақстанның Даму Банкі, Өнеркәсіпті дамыту қоры, Экспорттық-кредиттік агенттік және Qazaqstan Investment Corporation тарапынан да қолдау көрсетіледі.
Мобильді фронт-офистер Астана, Алматы және Шымкент қалаларын қоспағанда, Қазақстанның 17 өңірінде бекітілген кесте бойынша жұмыс істейді. Сапарлар апта сайын ұйымдастырылады, қажет болған жағдайда олардың жиілігі арттырылуы мүмкін. Шығу кестесі damu.kz сайтында және Қордың әлеуметтік желілерінде алдын ала жарияланады.
Жоба қала мен ауыл арасындағы географиялық кедергілерді азайтып, мемлекеттік қолдау шараларына қолжетімділікті, ашықтықты және тиімділікті арттыруға бағытталған. Бұл ауыл кәсіпкерлеріне ірі қалалардағы бизнес сияқты мүмкіндіктерге қол жеткізуге жол ашып, ел бойынша кәсіпкерліктің теңгерімді дамуына ықпал етеді.