Астанада Respublica партиясының кезектен тыс V съезі өтіп, онда партияның сайлауалды бағдарламасы мен сайлауға қатысатын кандидаттар тізімі бекітілді. Сондай-ақ делегаттар партия Жарғысына өзгерістер енгізіп, партия төрағасы Айдарбек Қожаназаровтың өкілеттік мерзімін тағы үш жылға ұзарту туралы шешім қабылдады, деп хабарлайды QazMonitor.
Съезге партия басшылығы, Орталық және өңірлік кеңестердің мүшелері, филиал төрағалары, депутаттар, сондай-ақ Respublica Jastary және ReWomen қауымдастықтарының белсенділері қатысты. Делегаттар партияның алдағы даму бағытын айқындап, электоралдық кезеңге қатысты негізгі шешімдерді қабылдады.
Жиында партияның соңғы үш жылдағы қызметі қорытындыланды. Осы уақыт ішінде партия өкілдері заңнамалық бастамалар көтеріп, депутаттық сауалдар жолдап, азаматтардың 12 мыңнан астам өтінішін қараған. Сонымен қатар жастар мен әйелдерге арналған білім беру жобалары жүзеге асырылып, кадрлық резерв қалыптастырылғаны айтылды.
Делегаттар партия Жарғысына енгізілген өзгерістерді де қолдады. Құжат Конституция талаптарына сәйкестендіріліп, партияішілік басқару жүйесін жетілдіруге, өңірлік құрылымдардың жұмысын күшейтуге, ашықтық пен ішкі партиялық демократияны дамытуға бағытталған.
Съездің негізгі шешімдерінің бірі – жаңа сайлауалды бағдарламаның қабылдануы болды. «Азаматтың игілігі – Жауапты қоғам – Тиімді мемлекет – Қауіпсіз ел» қағидатына негізделген құжат кәсіпкерлікті қолдау, жаңа жұмыс орындарын ашу, мемлекеттік басқаруды жаңғырту, білім беру мен денсаулық сақтау сапасын арттыру, цифрландыру, құқықтық институттарды нығайту және қоғамдық қауіпсіздікті қамтамасыз етуге арналған бастамаларды қамтиды.
Бағдарламаны таныстырған партия төрағасы Айдарбек Қожаназаров Қазақстанның басты байлығы табиғи ресурстар емес, адам капиталы екенін атап өтті.
«Қазақстанның басты байлығы – жер қойнауындағы қазба байлық емес, оның адамдары. Біз экономиканы тыңдайтын, жаңа салаларды қолдайтын және адал бәсекені қорғайтын мемлекет құру үшін жұмыс істейміз», – деді ол.
Партияның тең төрағасы Динара Шүкіжанова индустриялық бағыттағы басымдықтарды таныстырып, нақты секторды дамытуға арналған шешімдердің маңызын айтты.
Съезде Мәжіліс сайлауына қатысатын партия кандидаттарының тізімі де бекітілді. 76 адамнан тұратын тізім жаңару, кәсібилік және кең қоғамдық өкілдік қағидаттары бойынша жасақталған. Кандидаттардың орташа жасы – 40,9 жас. Тізімге 44 ер адам, 32 әйел, 11 жас кандидат, мүгедектігі бар үш азамат, сондай-ақ PolitIQ мектебі мен партияның кадрлық резервінен шыққан 10 түлек енгізілген.
Бұдан бөлек, делегаттар Бақылау-тексеру комиссиясының жаңартылған құрамын бекітті.
Партия басшылығы съезд қорытындысы бойынша Respublica ұйымдастырушылық қалыптасу кезеңін аяқтап, жаңа сайлауалды бағдарламамен, кәсіби командамен және елді дамытуға бағытталған ұсыныстармен саяси дамудың келесі кезеңіне өткенін мәлімдеді.