Жыл соңына дейін Солтүстік Арал теңізіне қосымша 1,2 млрд текше метр су жіберу жоспарланып отыр, деп хабарлайды QazMonitor ауыл шаруашылығы министрлігінің баспасөз қызметіне сілтеме жасап.
Солтүстік Аралды сақтау үшін Дүниежүзілік банкпен бірлескен жобаның екінші кезеңі әзірленген. Жоба аясында Көкарал бөгетін қайта жаңғыртып, теңіздегі су деңгейін көтеру көзделген. Нәтижесінде 2030 жылға дейін Солтүстік Аралдағы су көлемін 34 млрд текше метрге жеткізу жоспарланып отыр.
2025 жылғы 1 қазаннан бері Сырдария өзені арқылы Солтүстік Аралға 1,4 млрд текше метр су жіберілген. Қазір теңізге секундына 40 текше метр су ағызылып жатыр.
Бүгінде Солтүстік Аралдағы су көлемі 23,5 млрд текше метрді құрайды. Өткен жылмен салыстырғанда судың тұздылығы орта есеппен 10%-ға төмендеп, 7,9 промиллеге дейін азайған. Ал 2026 жылдың алғашқы жартысында теңізден 4,2 мың тонна балық ауланған.
Сондай-ақ Сырдарияға су жіберу көлемін секундына 100 текше метрге дейін арттыру үшін Аманөткел гидроторабын немесе шлюзін салу ұсынылды.
Су шаруашылығы комитетіне аталған нысанның жобалық-сметалық құжаттамасын әзірлеуді тапсырды. Сонымен қатар Арал-Сырдария бассейндік инспекциясына су үнемдеу технологиялары есебінен жиналған суды қоса алғанда, Солтүстік Аралға тұрақты су жіберуді қамтамасыз ету жүктелді.