Мемлекет басшысының су шаруашылығы инфрақұрылымын дамыту жөніндегі тапсырмасы аясында Үкімет резервінен Жетісу облысындағы Алакөл көлінің жағалауын қорғау жобасына 3 млрд теңге бөлінді. Тиісті қаулыға Премьер-министр Олжас Бектенов қол қойды, деп хабарлайды QazMonitor.
Бөлінген қаржы ұзындығы 6 шақырым болатын қорғаныс бөгетін салуға бағытталады. Оның 2,5 шақырымы Көктұма ауылының, ал 3,5 шақырымы Ақши ауылының аумағында орналасады.
Бұған дейін, 2025 жылы, ұзындығы 1,7 шақырым учаскеде жағалауды нығайту, жер және бетон жұмыстары жүргізіліп, габиондық конструкциялар орнатылған. Жаңа жоба жағалау сызығын нығайтып, көлдегі шөгінділердің қозғалысын реттеуге мүмкіндік береді. Сонымен қатар өңірдің туристік инфрақұрылымын дамытуға серпін береді.
Соңғы екі жылда Ақмола, Ақтөбе, Батыс Қазақстан, Қостанай, Солтүстік Қазақстан және Павлодар облыстарында жалпы ұзындығы 243 шақырым қорғаныс бөгеттері мен гидротехникалық құрылыстар салынды және күшейтілді.
Айта кетейік, бұған дейін Алакөлдегі туристік инфрақұрылымды дамытуға 10 млрд теңге бөлінетіні хабарланған болатын. Сондай-ақ курорт аумағындағы су қауіпсіздігі, санитарлық талаптардың сақталуы және жағалауға еркін қолжетімділік мәселелері бойынша кешенді тексеру жүргізу тапсырылған.