9 тамыз күні Астанада өтетін дәстүрлі Jüregımnıñ Jenımpazy қайырымдылық жүгіру фестиваліне байланысты қаладағы бірнеше көшеде көлік қозғалысына уақытша шектеу енгізіледі. Осыған байланысты елорда әкімдігі тұрғындар мен қала қонақтарына жол жүру бағытын алдын ала жоспарлауға кеңес береді, деп хабарлайды QazMonitor қала әкімдігінің баспасөз қызметіне сілтеме жасап.
Әкімдіктің мәліметінше, қозғалысқа енгізілетін шектеулер мынадай болады:
• 07:00-08:05 аралығында Түркістан көшесінде Abu Dhabi Plaza бағытына қарай бір жолақтағы көлік қозғалысы ішінара шектеледі;
• 07:00-07:40 аралығында Ұлы Дала даңғылы толық жабылады;
• 07:10-09:15 аралығында Ақмешіт көшесі бойымен EXPO аумағындағы мәреге дейінгі бағытта бір жолақтағы қозғалыс шектеледі.
Ұйымдастырушылар жүргізушілер мен жаяу жүргіншілерден уақытша қолайсыздықтарға түсіністікпен қарап, қозғалыс бағытын алдын ала жоспарлауды сұрайды.
Jüregımnıñ Jenımpazy – Қазақстандағы ең ірі қайырымдылық жүгіру фестивальдерінің бірі. Биыл тоғызыншы рет ұйымдастырылатын іс-шара ағза трансплантациясын күтіп жүрген науқастарды қолдауға және қоғам назарын трансплантология мәселесіне аударуға бағытталған. 21 мамырдағы мәлімет бойынша, елімізде трансплантацияны күту тізімінде 4 739 адам тұр.
Биыл фестивальге қатысушылар мен қонақтардың жалпы саны шамамен 7 мың адамды құрайды. Олардың қатарында медицина қызметкерлері, ағза трансплантациясынан өткен пациенттер, бизнес және қоғам өкілдері, кәсіби спортшылар, әуесқой жүгірушілер мен елорда тұрғындары бар.
Ресми ашылу рәсімінен кейін жүгіру сағат 07:00-де басталады. Қатысушылар 10 шақырым, 3 шақырым және 1 шақырым қашықтықтарда сынға түседі.
Фестиваль алаңы 05:30-да «Ұлы Дала Елі» монументі маңында жұмысын бастайды. Жарыс алдында қатысушылар үшін таңғы йога және кәсіби жаттықтырушылардың қатысуымен жалпы дене қыздыру жаттығулары ұйымдастырылады.
Фестиваль аясында балалар аймағы, аниматорлар мен аквагрим қызметі, фуд-корт, қазақстандық брендтердің жәрмеңкесі, серіктестердің интерактивті алаңдары, тегін медициналық check-up аймағы және жүрек-өкпе реанимациясы тәсілдерін үйрету алаңы жұмыс істейді.
Концерттік бағдарламаның басты қонақтары ретінде Орынхан, Мархаба Сәби, Бүркіт пен Аиша өнер көрсетеді.
Шараға белгілі қоғам қайраткерлері, медицина саласының мамандары, халықаралық ұйымдардың өкілдері мен еріктілер де қатысады. Олардың қатарында Heart Center Foundation қорының құрылтайшысы, UMC басқарма төрағасы, медицина ғылымдарының докторы Юрий Пя, қордың Қамқоршылық кеңесінің мүшесі Әлішер Елікбаев және өзге де танымал тұлғалар бар.
Ұйымдастырушылардың мәліметінше, жүгіру фестивалі барысында жиналған барлық қаражат Трансплантацияны үйлестіру жөніндегі республикалық орталыққа, Қазақстандағы трансплантация орталықтарына, сондай-ақ кардиохирургия мен трансплантология саласындағы білім беру жобаларын дамытуға бағытталады.