«Бәйтерек» ұлттық басқарушы холдингі» акционерлік қоғамы мен Малайзияның Perusahaan Otomobil Nasional Sdn. Bhd. (PROTON) автомобиль компаниясы өзара ынтымақтастық туралы меморандумға қол қойды.
Ынтымақтастық өндірісті жергіліктендіру, технологиялар трансфері және саланың экспорттық әлеуетін арттыруға бағытталған.
«Серіктестеріміздің тәжірибесі мен технологиялары заманауи өндірістік базаны қалыптастыруға және ұлттық автокөлік бренді құруға мүмкіндік береді», — деді «Бәйтерек» ұлттық басқарушы холдингі» АҚ басқарма төрағасы Рустам Қарагойшин.
Өз кезегінде PROTON компаниясының вице-президенті Айнол Азмил Абу Бакар бұл меморандумға қол қою Малайзия компаниясының Қазақстандағы халықаралық қатысуын кеңейтудің маңызды кезеңі екенін атап өтті.
«Қазақстанның стратегиялық бастамаларының бір бөлігі болуға қуаныштымыз. Біздің тәжірибеміз бен технологиялық шешімдеріміз жергілікті өндірісті дамытуға және екі ел арасындағы ынтымақтастықты нығайтуға ықпал етеді», — деп атап өтті ол.
Келісім аясында техникалық-экономикалық зерттеулер жүргізу, жергілікті серіктестерді айқындау және қаржыландыру тетіктерін пысықтау жоспарланған.
Дереккөз: «Бәйтерек» ҰБХ