Түркістан облысында қызанақ өсіруге арналған жылыжай кешені ашылды. Онда жылына 27 мың тонна қызанақ өсіру жоспарланып отыр.
Өңір әкімдігінің мәліметінше, «Ecoculture-Eurasia» кешені Орталық Азиядағы агроөнеркәсіптік сектордың ең технологиялық нысандарының бірі болуға үміткер. Жалпы аумағы 52 гектарға жуық жылыжай кластері жылына 27 мың тонна көкөніс өндіруге есептелген, онда ірі және ұсақ жемісті қызанақ сорттары өсіріледі.
«Жобаның құны 42 млрд теңгені құрайды. Биыл 21 гектар жылыжайды пайдалануға беру жоспарланған. Қуаты 14 МВт болатын 9 қазандық орнатылды, 37,76 гектар аумақтағы жылыжай блоктарына полиэтилен қаптау жұмыстары аяқталды, ал жалпы аумағы 12,5 гектар болатын екі блок көшет отырғызуға толық дайын», делінген ақпаратта.
Жылыжайлар толық технологиялық цикл принципімен жабдықталған, бұл оңтүстік Қазақстан климатына тән елеулі температуралық ауытқулар кезінде де тұрақты өндірісті қамтамасыз етеді.
Биыл қазан айында 6,25 гектар аумаққа «Климон F1» қызанақ сортының алғашқы көшеттері отырғызылған, алғашқы өнімді 2026 жылдың ақпанында алу көзделіп отыр. Алдағы уақытта ассортимент 12 қызанақ сортына дейін арттырылады.
«Дайын өнім ішкі нарыққа да, экспортқа да, ең алдымен Ресейге, оның ішінде Сібір мен Қиыр Шығысқа жөнелтіледі. Өндіріс көлемі мен жеткізілімдердің тұрақтылығы кешенді Қазақстанның көкөніс экспортының маңызды қатысушысына айналдырады», деп қосты әкімдікте.
Жобаның серіктесі - Еуразиядағы жылыжай көкөністері нарығындағы ең ірі қатысушылардың бірі саналатын ресейлік «ЭКО-культура» агрохолдингі. Компания инновациялық технологияларды енгізу, жылыжай нысандарын жобалау және өндірістік бағдарламаларды дайындау бойынша консультациялық қолдау көрсетеді.