Қазақстанда фермерлердің су алу және жеткізу инфрақұрылымын тартуға, су үнемдеу технологияларын сатып алуға және орнатуға жұмсалған шығындардың өтеу үлесі 50 пайыздан 80 пайызға дейін ұлғайтылды. Бұл туралы Үкімет отырысында Су ресурстары және ирригация министрі Нұржан Нұржігітов айтты, деп хабарлайды QazMonitor.
Оның айтуынша, тарифке байланысты субсидиялардың дифференциалды мөлшері енгізілген. Егер 2024 жылға дейінгі су үнемдеу технологиялары енгізілген алаңдардың өсімі орта есеппен жылына 30 мың гектарды құраса, соңғы екі жылда орта есеппен жылына 150 мың гектарды құрады. Су үнемдеу технологияларын қолдана отырып, суарылатын алаң 543,5 мың гектарға дейін өсті.
«2030 жылға қарай бұл алаңды 1,3 миллион гектарға дейін жеткізуді жоспарлап отырмыз. Осы мақсаттарға жету үшін 2026-2028 жылдарға арналған жалпы сипаттағы трансферттер арқылы жергілікті бюджеттерге 228 миллиард теңгеден астам қаражат енгізілді. Бұл алдыңғы үш жылдық кезеңмен салыстырғанда төрт есе көп», деді Нұржігітов.
Сонымен қатар министр бюджеттік жоспарлау мәселесіне де тоқталып өтті. Көптеген облыстарда қаражат толық көлемде қарастырылғанымен, бір өңірде іркіліс бар.
«Алайда Жамбыл облысында 2026-2028 жылдарға арналған облыстық бюджет заңымен бөлінген қаражат көлемі бекітілмеген, яғни инвестициялық субсидиялауға 37,7 миллиард теңге, суару суын субсидиялауға 295,5 миллион теңге. Жалпы көрсетілген мемлекеттік қолдау шараларын іске асыру Ауыл шаруашылығы министрлігінің субсидиялаудың бірыңғай мемлекеттік ақпараттық жүйесі арқылы жүзеге асырылады. Қазіргі уақытта мүдделі мемлекеттік органдармен бірлесіп, жүйеге салалық мәртебе беру мәселесі пысықталуда», дер қосты ол.
Айта кетейік, жаңа Су кодексі аясында өнеркәсіп орындарына суды қайталама пайдалану міндеттеліп отыр. Кәсіпорындарға бұл жүйеге көшу үшін 7 жыл уақыт берілді. Бұл реформа 2030 жылға қарай суды қайталама пайдалану үлесін 13%-дан 28%-ға дейін арттырып, шамамен 1,5 миллиард текше метр суды үнемдеуге мүмкіндік береді.