Сенат депутаты Геннадий Шиповских цифрлық платформалардағы заңсыз контент пен танымал тұлғалардың жауапкершілігіне қатысты депутаттық сауал жолдады. Оның сөзінше әлеуметтік желідегі жарнама тек сауда құралы емес, халықтың қаржылық қауіпсіздігі мен денсаулығына қауіп төндіретін факторға айналған, деп хабарлайды QazMonitor.
«Соңғы уақытта әлеуметтік желіде урологиялық сипаттағы өнімдерге ерекше назар аударылатын, жыныстық функцияға, ерлер денсаулығына әсер ететін құралдармен қатар, гормоналдық препараттар, салмақ төмендетуге арналған өнімдер, иммунитетті арттыруға бағытталған қоспаларды медициналық білімі жоқ тұлғалар тарапынан ашық әрі белсенді түрде жарнамалаудың кең таралған құбылысқа айналуы. Бұл өнімдер кейде «табиғи», «қауіпсіз», «дәрігерсіз-ақ шешім» деген ұранмен ұсынылады. ...Ертең бір азамат осындай жарнамаға сеніп денсаулығына зиян келтірсе, соның жауапкершілігін кім көтереді деген сұрақ туындайды. Миллион қаралым жинаған жарнама авторы ма, әлде тағы да қарапайым халық өз мәселесімен өзі қалуы тиіс пе?» деді Геннадий Шиповских.
Сонымен қатар ол желіде контент түрлерін қарау кезінде пайдаланушының еркінен тыс есірткі, жезөкшелік, онлайн казино және порнографиялық жарнамалар шыға беретінін айтты. Бұл мемлекет тарапынан жүргізіліп жатқан тәрбие жұмыстарының тиімділігін жоққа шығарып, «тесік шелекке су құйғанмен» бірдей әсер беріп отыр деп есептейді.
Осыған орай, депутат Meta (Facebook, Instagram) және TikTok компанияларымен Қазақстан аумағында заңсыз жарнамалардың таралуын шектеу бойынша нақты келісімдер жасауды, ЖИ және арнайы алгоритмдер көмегімен есірткі, казино, жалған акциялар сияқты қауіпті жарнамаларды жедел анықтап, бұғаттау механизмін енгізу, сондай-ақ медициналық білімі жоқ тұлғалардың денсаулыққа қатысты препараттарды жарнамалауына тыйым салу және тұтынушы зардап шеккен жағдайда жарнамалаушының (блогердің - ред) жеке жауапкершілігін заңнамалық деңгейде бекітуді ұсынды.