Қазақстанда олимпиадалық резервті даярлау жүйесі жаңа талаптарға көшеді. Астанада Туризм және спорт министрі Ербол Мырзабосыновтың төрағалығымен өткен кеңесте мамандандырылған мектеп-интернат-колледждердің қызметін талдау нәтижелері қаралып, саланы жетілдіруге бағытталған нақты ұсыныстар айтылды.
Спорт және дене шынықтыру істері комитеті төрағасының орынбасары Аманбай Нұрмұханбетов жүргізілген кешенді талдаудың қорытындыларын таныстырды. Оның айтуынша, сапалы спорт резервін қалыптастыру үшін қолданыстағы модельді қайта қарау қажет.
Қазіргі таңда елде 16 облыстық мамандандырылған олимпиадалық резерв мектеп-интернат-колледжі, бір республикалық спорт колледжі және үш республикалық мамандандырылған интернат жұмыс істейді. Бұл ұйымдарда спорттың 41 түрі дамытылып, 6 381 тәрбиеленуші білім алып жатыр.
Министрлік осы мекемелердің тиімділігін арттыру үшін басшыларға арналған негізгі көрсеткіштер жүйесін (KPI) енгізуді ұсынып отыр. Атап айтқанда, облыстық интернаттарда өңірлік құрамаға, ал республикалық деңгейде ұлттық құрамаға іріктелетін спортшылардың үлесін арттыру негізгі өлшемдердің бірі болмақ. Сонымен қатар жаттықтырушы-педагогикалық құрамның қызметін жан-жақты бағалау тетігін күшейту жоспарланған.
Кеңес қорытындысында спорт түрлері бойынша нақты мамандандыруды тереңдету, материалдық-техникалық база мен кадрлық әлеуетке сәйкес қайта бөлу, сондай-ақ колледждердегі оқу мерзімін 2 жыл 10 айдан 2 жылға дейін қысқарту ұсынылды. Үнемделген қаражатты бакалавриат деңгейіндегі мемлекеттік гранттарды қаржыландыруға бағыттау көзделіп отыр.
Министрлік ұсынып отырған бұл өзгерістер олимпиадалық резервті жүйелі түрде нығайтуды, басқару тиімділігін арттыруды және халықаралық аренада бәсекеге қабілетті қазақстандық спортшыларды даярлауды арттыруды көздейді.
Бұған дейін Қазақстан 2025 жылы жаңа спорт жетістіктеріне қол жеткізгені хабарланды. Отандық спортшылар түрлі жарыстарда жеңімпаз атанып, ел тарихында жаңа есімдер пайда болды.