Қазақстанда гидтердің, экскурсия жүргізушілерінің және туризм нұсқаушыларының қызметін реттейтін бірыңғай ережелер енгізілді. Құжатта туристік қызмет көрсету сапасына, туристердің қауіпсіздігіне және мамандардың жауапкершілігіне қойылатын талаптар айқындалған. Туризм және спорт министрінің бұйрығымен бекітілген ереже 2026 жылғы 1 тамыздан бастап күшіне енеді, деп хабарлайды QazMonitor туризм және спорт министрлігінің баспасөз қызметіне сілтеме жасап.
Жаңа талаптарға сәйкес, туристік қызметтер клиентпен жасалған келісімшарт негізінде көрсетіледі. Келісімшартты рәсімдеу үшін турист өзі және келісімшарт жасалатын өзге тұлғалар туралы қажетті мәліметтерді ұсынуы тиіс.
Ережеге сәйкес, гидтер мен экскурсия жүргізушілері сапар басталғанға дейін кемінде үш күнтізбелік күн бұрын туристерге алдағы саяхаттың ерекшеліктері туралы ақпарат беруге міндетті. Атап айтқанда, елге немесе уақытша болатын жерге кіру және онда болу тәртібі, жергілікті заңнама, халықтың салт-дәстүрлері, маршруттар мен көрікті орындар, сондай-ақ ықтимал қауіптер мен тәуекелдер туралы мәлімет ұсынылуы қажет.
Егер сапар барысында төтенше жағдай орын алса, маман бұл туралы уәкілетті мемлекеттік органдар мен туристердің туыстарына жедел хабарлауға міндетті. Ал қауіптілігі жоғары маршруттарға қатысатын туристер ықтимал тәуекелдер туралы хабардар екенін жазбаша түрде растауы қажет.
Жұмысты бастау үшін бұрынғыдай Қазақстан Республикасының азаматы болуы және eLicense.kz порталы арқылы хабарлама жіберу талап етіледі. Сонымен қатар жаңа ережелер гидтер мен экскурсия жүргізушілеріне қызметін жүзеге асыру үшін өзіне қолайлы ұйымдық-құқықтық нысанды еркін таңдауға мүмкіндік береді. Бұдан бөлек, олардың қызметін өзін-өзі жұмыспен қамтығандар үшін рұқсат етілген қызмет түрлерінің тізіміне енгізу мәселесі қарастырылып жатыр.
Министрлік келіп түскен хабарламалар негізінде гидтердің, экскурсия жүргізушілерінің және туризм нұсқаушыларының электронды тізілімін жүргізеді. Ол Туризм және спорт министрлігі мен Kazakh Tourism ұлттық компаниясының ресми интернет-ресурстарында жарияланады. Осылайша туристер қызмет көрсететін мамандардың ресми тіркелгенін тексере алады.
Туризм және спорт министрлігінің мәліметінше, жаңа ережелер бірыңғай кәсіби стандарттарды қалыптастыруға, туристік қызметтердің сапасын арттыруға және Қазақстан бойынша саяхаттардың қауіпсіздігі мен жайлылығын қамтамасыз етуге бағытталған.