Қазақстанның Мемлекеттік кірістер комитеті салықтық әкімшілендіруді цифрландыру аясында маңызды қадам жасады. Енді қосылған құн салығын (ҚҚС) төлеушілер үшін 300.00 декларациясын алдын ала толтыруға арналған жаңа сервис қолжетімді болады.
Комитет бұл сервис адам факторын азайту және тәуекелдерді басқаруға мүмкіндік береді, деп есептейді. Жаңа құралдың басты мақсаты - салық төлеушілердің жұмысын жеңілдету және қателіктерді барынша азайту болып отыр. Жүйе есептелген салық сомаларын алдын ала көрсету арқылы бизнес өкілдерін камералдық бақылау хабарламалары мен күтпеген айыппұлдардан сақтандырады.
Декларацияны толтыру үшін МКК электрондық шот-фактуралар (ЭШФ); салық төлеушілердің жеке шоттары мен тауарларға арналған декларациялар ақпараттық жүйелерінің деректерін пайдаланады.
«Сервис аясында 300.00 нысанындағы 13 жолы автоматты түрде толтырылады, оларды қажет болған жағдайда пайдаланушы ұлғайту немесе азайту жағына қарай өз бетінше түзете алады», деді комитетте.
Қазір Жаңа сервис пилоттық режимде жұмыс істейді. Салық төлеушілер бұл мүмкіндікті 2025 жылдың 4-тоқсанына арналған декларацияны тапсыру кезінде пайдалана алады.
Мемлекеттік орган сервисті пайдаланушылардың пікіріне ашық екенін мәлімдеді. Қазақстандықтар жүйені жетілдіру бойынша ұсыныстар мен ескертулерді арнайы Telegram-бот (@icna_review_bot) арқылы жолдай алады.
Еске салсақ, келесі жылы Қазақстанда жаңа Салық кодексі қолданысқа енгізіледі. Кодекске сәйкес, қосылған құн салығы (ҚҚС) 16% мөлшерінде болады. Үкімет бизнеске қысымды азайтып, цифрландыру арқылы салық төлеушімен өзара іс-қимылды сервистік форматқа көшіруді жоспарлап отыр. Реформалар пакеті жаңа Салық кодексі аясында кезең-кезеңімен енгізіледі.