Қазақстанда мал шаруашылығы ауыл шаруашылығы өнімінің 39%-ын құрағанымен, саланың жылдық өсімі әлі де төмен (2-3%). Үкімет саланың әлеуетін толық ашу үшін 2026-2030 жылдарға арналған кешенді жоспар қабылдады, деп хабарлайды QazMonitor.
Мал шаруашылығын дамытудың 2026-2030 жылдарға арналған кешенді жоспарына сәйкес, бес жыл ішінде негізгі көрсеткіштерді айтарлықтай өсіру көзделеді. Ауыл шаруашылығы министрі Айдарбек Сапаровтың мәліметінше, атап айтқанда ірі қара санын 7,9 млн-нан 12 млн-ға, ұсақ малды 20,2 млн-нан 28 млн-ға жеткізу Ет өндірісін 1,8 млн тоннаға дейін ұлғайтып, ет экспортын 2 есе арттырып, 165 мың тоннаға жеткізу жоспарланып отыр.
Шаруаларға қолжетімді болу үшін бірнеше бағытта жеңілдетілген несиелер беріледі. Оның ішінде асыл тұқымды мал сатып алуға жылдық 6%-бен несие беріледі. Жайылым мен инфрақұрылымға шалғайдағы шаруашылықтар үшін 6%-бен 50 млрд теңге бөлінеді.
Сондай-ақ мал азығын дайындайтын техникаға 5%-дық мөлшерлеме қарастырылған. Айналым қаражатын толықтыру үшін саланы дамытуға жалпы сомасы 225 млрд теңге 5%-бен несиеге беріледі. Даму қоры кепілдік беру арқылы көмектеседі.
Сонымен қатар Қазақстанда алғаш рет малшылардың әлеуметтік жағдайына баса назар аударылды. Енді шопандар мен қойшылар 55 жасқа толғаннан кейін арнайы әлеуметтік төлем алу құқығына ие болады. Ал сала мамандары үшін ауылдық жерлерде тұрғын үйлер салынады.
Бұған қоса экспортқа шығу үшін ветеринариялық нысандар жаңартылып, базарларда күнделікті бақылау күшейтіледі. Пайдаланылмай жатқан жайылымдар мемлекетке қайтару жұмысы жалғасады. Қазірдің өзінде астық егетін үш өңір бойынша 330 шаруашылық ерекше бақылауға алынған.