Қазақстанның халық әртісі Димаш Құдайберген түркі әлемінің мәдениетін жаһандық деңгейде дамытуға қосқан орасан зор үлесі үшін ұйымның ең жоғары наградасы – «Түркі әлемінің мәдени елшісі» атаулы орденімен марапатталды, деп хабарлайды QazMonitor.
Қазақстандық әнші - аталған мәртебеге ие болған әлемдегі екінші тұлға. Бұған дейін бұл атақ тек Түркияның Нобель сыйлығының лауреаты, әйгілі профессор Азиз Санджарға ғана берілген болатын.
Сонымен қатар салтанатты шара барысында кино өнеріндегі жетістіктері үшін Қазақстанның еңбек сіңірген қайраткері, актриса Самал Еслямова да жоғары баға алды. Оған түркі және әлемдік киноматографияның дамуына қосқан айрықша үлесі үшін «Түркі әлемінің үздік әртісі» номинациясы бойынша ТҮРКСОЙ-дың арнайы жүлдесі табысталды.
«Димаш Құдайберген музыка арқылы мәдени елші миссиясын атқарып келсе, Самал Еслямова қазақстандық кино өнерінің символына айналды. Бұл марапаттар – олардың адал еңбегі мен талантына берілген лайықты құрмет», деді ТҮРКСОЙ ұйымының Бас хатшысы Сұлтан Раев.
