Жетісу облысындағы Бикен Римова атындағы драма театрына академиялық мәртебе берілді. Бұл ұсынысты биыл 21 мамырда Мәдениет саласы қызметкерлерінің күніне арналған салтанатты жиында Мемлекет басшысы айтқан болатын.
Талдықорған театрына бұл мәртебені беру туралы қаулыға Премьер-Министр қол қойған.
«Жарты ғасырлық белесте театр өз репертуарын байытып, қаншама жас таланттарды тәрбиелеп шығарды. Әрбір премьера, гастроль, көрерменнің қошеметі - біздің ортақ тарихымыздың алтын парақтары. Бүгін, міне, театрымыз академиялық мәртебе алып отыр. Бұл тек атақ қана емес, біздің өнерді өркендетуге қосқан үлесіміздің және ұлт руханиятын дамытудағы еңбегіміздің лайықты бағалануы деп білеміз», - деді Б. Римова атындағы драма театрының көркемдік жетекшісі Сағындық Жұмаділ.
Атап өтсек, Талдықорған театрының негізі 1975 жылы қаланған, биыл 50 жылдығы аталып өтілді. Өнер ұжымы театр шымылдығын алғаш рет Ғабит Мүсіреповтің «Қозы Көрпеш – Баян сұлу» пьесасымен ашқан болатын. Бүгінде театрда Алмахан Кенжебекова, Әлихан Ыдырышева, Лидия Каденова, Дулыға Ақмолда секілді Қазақстанның халық артистері бар. Театрда жалпы 145 адам еңбек етеді.