Алматы мен Астананың клиникалары биометриялық сәйкестендіру технологиясына көшу арқылы пациенттерді тіркеу жылдамдығын бірнеше есе арттырды. Emdeu AI мен Biometric.Vision серіктестігі медициналық қызмет көрсету сапасын жаңа деңгейге шығарып, құжат айналымындағы қателіктер мен қауіпсіздік мәселелерін түпкілікті шеше бастады.
Қазақстанның денсаулық сақтау жүйесіндегі цифрлық трансформация жаңа кезеңге қадам басты. Елдегі жекеменшік және мемлекеттік клиникалар пациенттермен өзара әрекеттесуді оңтайландыру мақсатында жасанды интеллект негізіндегі биометриялық шешімдерді енгізе бастады. Бұл технологиялық жаңартудың алдыңғы шебінде Emdeu AI медтек-компаниясы мен Biometric.Vision платформасының ынтымақтастығы тұр.
Бұрын пациенттер тіркеу бөлімінде ұзын-сонар кезекте тұрып, анкеталарды қолмен толтыруға мәжбүр болса, енді бұл процесс қас-қағым сәтте жүзеге асады. Биометриялық платформа пациенттің жеке басын бірден танып, деректерді жүйеге автоматты түрде енгізеді. Бұл тек уақытты үнемдеп қана қоймай, медициналық қызметкерлердің жұмыс жүктемесін айтарлықтай жеңілдетті.
Медициналық мекемелер үшін ЖИ-шешімдерді енгізу тек имидждік қадам емес, нақты экономикалық тиімділікті көрсетіп отыр. Атап айтқанда пациенттердің дербес деректерін жинау мен өңдеу бірнеше есе жылдамдады. Механикалық және әкімшілік қателердің алды алынып, клиенттік жол (CJM) оңтайландырылды. Сонымен қатар биометрия құпия ақпаратты қорғаудың ең сенімді әдісі болып табылады, бұл медициналық деректердің бөгде адамдардың қолына түсуіне жол бермейді.
Бұған дейін Biometric.Vision технологиялары қаржы секторында, логистикада және HR Tech салаларында өзінің тиімділігін дәлелдеген. Енді бұл тәжірибе медицина саласына бейімделіп, офлайн-бизнесте де жоғары нәтиже көрсетіп отыр.
Қазіргі уақытта бұл инновациялық шешім Алматы мен Астана қалаларының клиникаларында сәтті қолданылып жатыр. Компания алдағы уақытта бүкіл Қазақстан бойынша ауқымды кеңею және халықаралық нарықтарға шығуды жоспарлап отыр.