Алматыда автокөліктердің экологиялық талаптарға сәйкестігін тексеру барысында бірқатар заңбұзушылық анықталды. 3 ақпанда өткен бақылау шараларын «Eco Almaty» ЖШС қалалық Полиция департаментімен бірлесіп, мегаполистің бірнеше ауданында аспаптық өлшеулер арқылы жүргізді, деп хабарлайды QazMonitor.
Қалалық Экология және қоршаған орта басқармасының мәліметінше, Саин және Дулати көшелерінің қиылысында 30 автокөлік тексеріліп, оның 16-сынан рұқсат етілген экологиялық көрсеткіштердің асып кеткені анықталған. Заңбұзушылықтардың екеуі дизельді қозғалтқышы бар көліктерден, ал 12-сі бензинмен жүретін автокөліктерден тіркелді.
Қосымша тексеру Сүйінбай даңғылы мен Бекмаханов көшесінің қиылысында өтті. Бұл учаскеде 20 автокөлік тексеріліп, дизель отынымен жүретін 6 көліктен экологиялық нормативтердің асып кетуі анықталды.
Жалпы есеппен 50 автокөлік тексеріліп, нәтижесінде 22 әкімшілік хаттама толтырылды. Заңнамаға сәйкес, шығарындылардағы ластаушы заттардың мөлшері немесе шу деңгейі белгіленген нормадан асатын көліктерді пайдаланғаны үшін жеке тұлғаларға 10 айлық есептік көрсеткіш, ал заңды тұлғаларға 100 АЕК көлемінде айыппұл қарастырылған.
Айта кетейік, бақылау шаралары Алматы қаласының атмосфералық ауаны қорғау қағидалары аясында жүргізіліп жатыр. Аталған құжат 2025 жылғы 30 желтоқсанда бекітілген және автокөлік құралдарын қоса алғанда, шығарындылар көздеріне экологиялық бақылауды күшейтуге, сондай-ақ қолайсыз метеорологиялық жағдайларда ауаның ластануын азайтуға бағытталған.
