Алматыда қаладағы ең ірі қоғамдық кеңістіктердің бірі – Тұңғыш Президент саябағы кешенді түрде қайта жаңғыртылады. Жоба аясында саябақ толық жабылмай, тұрғындар үшін ашық күйінде кезең-кезеңімен жаңартылмақ, деп хабарлайды QazMonitor.
Қоғамдық кеңістіктерді дамыту басқармасының мәліметінше, жаңғырту табиғи ландшафтты сақтай отырып, заманауи әрі көпфункциялы орта қалыптастыруды көздейді. Саябақ 2010 жылы ашылғалы бері күрделі жөндеуден өтпеген. Қазіргі инфрақұрылым заманауи талаптарға сай жүйелі жаңартуды қажет етеді.
Іле Алатауының баурайында орналасқан саябақтың аумағы 62,4 гектарды құрайды. Мұнда орталық аллея, субұрқақтар кешені, амфитеатр, веложолдар мен панорамалық демалыс орындары бар.
Жоба аясында кіреберіс аймақтар жаңартылып, жаяу жүргіншілер бағыттары көріктендіріледі, демалыс алаңдары абаттандырылып, жаңа функционалдық кеңістіктер құрылады. Басымдық – жасыл желекті сақтау мен дамытуға, сондай-ақ келушілердің барлық санаты үшін қолайлы инфрақұрылым қалыптастыруға беріледі.
Жаңғырту тұжырымдамасы халықаралық тәжірибеге сүйене отырып, британдық ландшафт сәулетшілері мен отандық мамандардың қатысуымен әзірленген.
Құрылыс жұмыстары кезең-кезеңімен жүргізіледі. Алғашқы кезеңде саябақтың оңтүстік бөлігі уақытша жабылады. Орталық бөліктен кіреберіс аркаға дейінгі аумақ келушілер үшін ашық болады. Әр кезең аяқталған сайын жаңартылған аймақ пайдалануға беріліп, жұмыс келесі бөлікте жалғасады.