Ақтөбеде орнатылған автономды жаяу жүргіншілер өткелі адам жолдың жүріс бөлігіне шықпай тұрып жарық сигналын береді және жылдамдықты төмендету қажеттігін ескертеді, деп хабарлайды QazMonitor. Жаңа жүйе қаладағы Әбілқайыр хан мен Сағадат Нұрмағамбетов көшелерінің қиылысында тәжірибе ретінде жұмыс істеп тұр.
Жаяу жүргінші анықталған сәтте өткел қосымша жарықпен және жолға стоп-сызықтың жарық проекциясымен белгіленеді. Бұл қараңғы уақытта өткелдің көрінуін айтарлықтай арттырып, жүргізушілердің назарын күшейтеді.
«Қазақстан жол ғылыми-зерттеу институты» мамандары көлік қозғалысын бақылап, өткелдің нормативтік талаптарға сәйкестігін тексеріп отыр. Мониторинг қорытындысы бойынша жүйенің тиімділігі бағаланып, еліміз бойынша осындай өткелдерді кезең-кезеңімен енгізу көзделуде.
Халықаралық тәжірибеге сәйкес, белсенді жарықтық индикация жаяу жүргіншіні қағып кету оқиғаларын 30-40% дейін азайтуға көмектеседі. Қазіргі уақытта жоба практикалық сынақ кезеңінен өтіп жатыр, ал жиналған деректер талданғаннан кейін осындай автономды өткелдерді республикалық және жергілікті жолдар желісінде енгізу мәселесі қарастырылады.