QazaqGaz Aimaq мобильді қосымшасы іске қосылып, бүгінде оны 500 мыңнан астам пайдаланушы жүктеген, деп хабарлайды QazMonitor.
Компанияның мәліметінше, қосымша арқылы 200 мыңнан астам газ есептегіш көрсеткіші жолданған. Негізгі функция - есептегіш деректерді фото арқылы автоматты түрде таниды және қателер мен ауытқуларды тексереді. Сонымен қатар тұтынушылар төлем және тұтыну тарихын көріп, есептегішті тексеру мерзімі мен жоспарлы жұмыстар туралы хабарлама ала алады.
Қазір қосымшада виртуалды AI-кеңесші жабық тестілеуден өтуде. Жасанды интеллектке негізделген көмекші табиғи газ тұтынушыларының сұрақтарына тәулік бойы жауап береді. Бүгінде компанияның колл-орталығы тек жұмыс уақытында қызмет көрсетеді, ал жаңа сервис 24/7 режімінде қолдау көрсетеді деп жоспарланып отыр.
AI-ассистент түрлі LLM-модельдер негізінде сынақтан өтіп жатыр. Компания ең тиімді әрі дәл шешімді таңдауға басымдық беріп отырғанын хабарлайды. Ақпараттың сапасы мен өзектілігіне ерекше назар аударылады.
Виртуалды көмекші тарифтер, нормативтік-құқықтық актілер, газға қосылу тәртібі, қажетті құжаттар тізімі және өзге де салалық мәселелер бойынша ақпарат береді.
