Камералар агрессия, жанжал және буллинг белгілерін автоматты түрде анықтауға мүмкіндік береді. Бұл бастама Қазақстан балалары тұжырымдамасы 2026–2030 аясында жүзеге асырылып жатыр, деп хабарлайды QazMonitor.
Жоба балалардың қауіпсіздігін күшейтуге, тәуекелдерді ерте анықтауға және оқушыларға қолдау көрсету жүйесін жетілдіруге бағытталған. Қазіргі уақытта еліміздің бірқатар өңірінде бейнеаналитикаға негізделген жүйені енгізу бойынша пилоттық жоба іске асырылып жатыр.
Мысалы, 2025–2026 оқу жылында Астанадағы №107 мектеп базасында жасанды интеллект элементтері бар камералар орнатылды. Бүгінде мұндай жүйелер 46 мектеп пен 8 балабақшада қолданылады. Бұл технология ықтимал жанжалдарды ерте кезеңде анықтап, педагогтерге жедел әрекет етуге көмектеседі.
Балаларды қорғау жүйесі тек мектеп қауіпсіздігімен шектелмейді. Ел бойынша 131 отбасыны қолдау орталығы жұмыс істейді. Олар ата-аналарға психологиялық, әлеуметтік және құқықтық көмек көрсетеді. Сонымен қатар ата-аналарға арналған онлайн курстар ata.ana.kz платформасында қолжетімді.
Балаларды қорғау бағытында басқа да шаралар қолға алынуда. Соның ішінде зорлық-зомбылықтан зардап шеккен балаларға арналған арнайы көмек кабинеттерін ашу жоспарланған. Бұл орталықтарда қызмет «бір терезе» қағидаты бойынша көрсетіледі: психологиялық көмек, сот-медициналық сараптама және мамандардың кеңесі бір жерде ұйымдастырылады.
Бұдан бөлек, тәуекел тобына жататын оқушыларды ерте анықтау үшін мектептерде педагогтер, психологтар және ата-аналар қатысатын жеке профилактикалық жоспар әзірленеді.
Ал мемлекеттік қолдау шараларын біріктіру үшін mGov платформасында «Баланың жолы» атты цифрлық жүйе іске қосылмақ. Ол балаларға қатысты мемлекеттік қызметтерді бір жүйеге біріктіріп, түрлі ведомстволардың өзара жұмысын үйлестіруге мүмкіндік береді.
Айта кетейік, Қазақстан балалары тұжырымдамасы 2026–2030 биыл қаңтарда Үкімет шешімімен бекітілді. Құжатта балалардың қауіпсіздігі мен құқықтарын қорғауға бағытталған 158 іс-шара және 10 негізгі индикатор қарастырылған.
