2026 жылдың 1 қаңтарынан бастап Грузияға келетін әрбір турист ауырған немесе жарақат жағдайда медициналық шығындарды өтейтін сақтандыру полисіне ие болуға міндетті. Грузиялық БАҚ мәліметінше, сақтандыру құны турист үшін күніне шамамен 2 лари немесе 400 теңге төңірегінде болады.
Грузия келетін туристер үшін міндетті сақтандыруды енгізу ниетін сонау 2024 жылы мәлімдеген болатын, бірақ бұл шешімді іске асыру кейінге шегеріліп келді, деп атап өтті «Евразия» сақтандыру компаниясы басқарма төрағасының орынбасары Нұржан Жантөреев. Сарапшы QazMonitor тілшісіне берген сұхбатында мән-жайды түсіндіріп берді.
«Бұл бірегей практика емес, көптеген дамыған елдер виза рәсімдеу кезеңінің өзінде мұндай полистің болуын талап етеді. Жыл сайын Грузияға 7 миллионнан астам турист келеді. Егер осы мөлшердің тіпті 1%-ы медициналық көмекке жүгінсе, бұл халқы 4 миллионнан аспайтын елдің медициналық жүйесіне айтарлықтай салмақ салады», деді Нұржан Жантөреев.
Міндетті медициналық сақтандыру полисі туристің Грузияда болуының бүкіл мерзіміне, соның ішінде ұшып келу және ұшып кету күндеріне рәсімделеді. Грузияның миграциялық қызметі немесе шекара бақылауы айыппұл салуы мүмкін, ал заң бұзушылық қайталанса, туристің елге кіруіне мүлдем тыйым салынуы ықтимал. Сондай-ақ, полистің ағылшын немесе грузин тілдеріне аударылуы тиіс екені көрсетілген.
«Туристің медициналық сақтандыру полисінің құны бірнеше факторға, соның ішінде нақты елде болу күндерінің санына байланысты. Сондай-ақ құнына сақтандыру сомасы әсер етеді. Өтелетін тәуекелдердің көлемі, яғни сақтандырылушының медициналық көмекке жүгінуіне себеп болған жағдайлар да маңызды. Стандартты сақтандыру полистері спортпен немесе демалыстың экстремалды түрлерімен айналысу нәтижесінде алынған жарақаттарды өтемейді, бірақ мұндай опцияны да қарастыруға болады. Сондықтан турист саяхатты жоспарлау және кейіннен сақтандыруды рәсімдеу кезінде қайда, не үшін және қандай мерзімге бара жатқанын түсінуі тиіс. Қалай болғанда да, сақтандыру шығындары турдың жалпы құнымен салыстырғанда мардымсыз және көбінесе демалысқа арналған бүкіл бюджеттің 1%-ынан азын құрайды», деп қосты сарапшы.
Туристерді медициналық сақтандырудың стандартты полисі, әдетте, шұғыл госпитализация және амбулаторлық емдеу шығындарын өтейді. Стандартты бағдарламалар сондай-ақ шұғыл стоматологиялық қызметтерді де (әдетте $100 шегінде) қамтуы мүмкін. Бұдан бөлек, жақын маңдағы медициналық мекемеге немесе дәрігерге дейін тасымалдау, сондай-ақ тұрақты тұратын елінің жақын маңдағы халықаралық әуежайына дейін жеткізу шығындары өтеледі. Сақтандырылушы қаза тапқан жағдайда, денені тұрақты тұратын елінің жақын маңдағы халықаралық әуежайына дейін репатриациялауға байланысты шығындар өтеледі.
«Сақтандыру бойынша медициналық көмекке тек шұғыл жағдайда ғана жүгінуге болатынын есте сақтау керек. Сақтандыру созылмалы ауруларды жоспарлы емдеуді өтемейді. Қызметтер тізімін кеңейтуге, ал сақтандыру сомасының лимитін арттыруға болады. Сақтандыру компаниясының медициналық ассистанспен шарты бар, ол өз кезегінде бүкіл әлем бойынша клиникалармен байланыс орнатады – әдетте бұл баратын елде үлкен желісі бар ірі жеке медициналық орталықтар», деді Нұржан Жантөреев.
Шұғыл жағдайда сақтандыру оқиғасы орын алғанда – ең бірінші және міндетті түрде ассистансқа хабарласу қажет. Жедел жәрдем шақыруға болады, егер жағдай критикалық болмаса, тікелей ассистанс-серіктес клиникасына жүгіну керек.
Нақты клиникамен жасалған шарттың шарттарына байланысты, сақтандырылушы не медициналық шығындарды орнында төлеп, кейін қажетті құжаттар мен чектерді сақтандыру компаниясына өткізіп, кеткен шығындарын қайтарады, немесе ассистанс клиникамен есеп айырысуды өз бетінше жүргізеді, яғни сақтандырылушыға орнында ештеңе төлеудің қажеті жоқ, деп түсіндірді сақтандыру компаниясының өкілі.
Қазақстанда елде оқу немесе жұмыс істеу мақсатында уақытша жүрген, сондай-ақ емханаға тіркелуі қажет шетелдік азаматтар үшін жүктелген медициналық сақтандыру енгізілген және сәтті жұмыс істеп жатыр.
Елге келетін туристер үшін міндетті сақтандыруды енгізу емханаларға түсетін қаржылық жүктемені азайту үшін, әсіресе Алматы мен Астана сияқты шетелдіктер көп келетін қалаларда өте орынды. Бұдан бөлек, мұндай шара елге және атап айтқанда медицина саласына шетелдік сақтандыру компанияларынан қосымша қаражат тартуға мүмкіндік береді.
Шетелдік азаматтар сақтандыру өтемін дәл қазақстандық туристер шетелге шығарда жасайтындай өз елдеріндегі ерікті бағдарламалар бойынша сатып ала алады.
Егер шетелдік сақтандыруды Қазақстан аумағында рәсімдегісі келсе, ол өзін сақтандырудың екі класы бойынша қорғай алады. Бұл жазатайым оқиғадан сақтандыру бағдарламалары – нақты сақтандыру жағдайы үшін шартта белгіленген төлем жүзеге асырылады. Сондай-ақ тікелей медициналық қызмет шығындарын өтейтін ерікті медициналық сақтандыру бағдарламалары бар.
«Шетелдік азаматтар медициналық шығындарды сақтандыруды жаппай сатып алады деп айтуға болмайды, мұндай клиенттер сирек кездеседі. Әдетте, туристер сақтандыру полисін алдын ала тұрғылықты жері бойынша жергілікті сақтандыру компанияларынан сатып алады. Егер шетелдік азаматтар тарапынан тұрақты сұраныс туындаса немесе тиісті заңнамалық нормалар қабылданса, біз, әрине, нарыққа бағасы мен қызмет көлемі бойынша оңтайлы «дайын шешімдерді» ұсынамыз», – деп түйіндеді Нұржан Жантөреев.
