Түркістан қаласындағы №34 жалпы білім беретін мектепте цифрлық технологияларды оқу үдерісіне енгізуге бағытталған жаңа білім беру жобасы іске қосылды. Жоба жасанды интеллект негізінде 3D модельдеу мен мектептің тігін шеберханасын интеграциялауды көздейді.
Жоба аясында оқушылар арнайы бағдарламалар арқылы киім бөлшектерінің 3D моделін әзірлейді. Дайын сандық үлгілер 3D принтерге жіберіліп, олардың негізінде пішіндер мен трафареттер басып шығарылады. Бұл тәсіл дәстүрлі пішу үдерісін оңтайландырып, дәлдігі мен тиімділігін арттырады.
Алынған 3D трафареттер көркем еңбек сабақтарында оқу құралы ретінде пайдаланылады. Оқушылар бұйымның құрылымын, пішімін және өлшемдік пропорцияларын тәжірибе жүзінде зерделейді. Кейін трафареттер тігін шеберханасына жолданып, оқушылар нақты матадан дайын бұйымдарды тігуге кіріседі.
Жобаның негізгі мақсаты – цифрлық технологияларды тәжірибелік оқытумен ұштастыру арқылы оқушылардың дизайнерлік ойлауын, инженерлік дағдыларын және тігін ісіне қызығушылығын дамыту. Сонымен қатар бастама оқушыларды заманауи өндірістік үдерістермен таныстырып, болашақ кәсіби бағытын саналы таңдауға жағдай жасайды.
Аталған жоба мектептің STEAM бағыты аясындағы мүмкіндіктерін кеңейтіп, оқушылардың жаңа технологиялармен жұмыс істеу құзыреттерін қалыптастыруға ықпал етеді.
Дереккөз: Түркістан облысы әкімдігі
