2025 жылдың қорытындысы бойынша Қазақстанда бала тууына және оның күтіміне байланысты берілетін жәрдемақылар мен әлеуметтік төлемдердің жалпы сомасы 806,8 млрд теңгені құрады. Бұл қаражат республикалық бюджет пен Мемлекеттік әлеуметтік сақтандыру қоры (МӘСҚ) есебінен 565,7 мың адамға үлестірілді, деп хабарлайды QazMonitor.
Еңбек және халықты әлеуметтік қорғау министрлігінің мәліметінше, былтыр республикалық бюджеттен бала туғанда берілетін біржолғы жәрдемақыға 61,1 млрд теңге жұмсалды. Бұл көмекті 338 мың адам алды. Тек желтоқсан айының өзінде 25,9 мың анаға 4,7 млрд теңге аударылған.
Еске сала кетейік, бұл төлемге еліміздің азаматтарымен қатар, қандастар мен Қазақстанда тұрақты тұратын шетелдіктер де құқылы. 2025 жылы бекітілген АЕК көрсеткішіне сәйкес, жәрдемақы мөлшері 1-ші, 2-ші және 3-ші балаға – 149 416 теңге (38 АЕК), ал 4-ші және одан кейінгі балаларға – 247 716 теңге (63 АЕК).
Міндетті әлеуметтік сақтандыру жүйесіне қатысушылар, яғни жұмыс істейтін азаматтар үшін төлемдер айтарлықтай жоғары. 2025 жылы жүктілікке және босануға байланысты біржолғы әлеуметтік төлемді 200,8 мың адам алды. Оған бюджеттен 276,2 млрд теңге жұмсалды.
«Есепті кезеңде тағайындалған төлемнің орташа мөлшері 1 415 135 теңгені құрады», деді министрлікте.
Сонымен қатар, МӘСҚ-тан бала 1,5 жасқа толғанға дейінгі күтім бойынша ай сайынғы төлемдерге 425,5 млрд теңге бөлінді. Бұл төлемді 239,6 мың адам иеленді. Орташа айлық төлем мөлшері 85 993 теңге деңгейінде қалыптасты. Айта кетерлігі, бұл сома ата-ананың соңғы екі жылдағы орташа айлық табысының 40%-ын құрайды.
