2025 жылдың қорытындысы бойынша Қазақстанда шамамен 3 мың жетім бала отбасыларға орналастырылған, деп хабарлайды QazMonitor. Соңғы 10 жылда интернаттық ұйымдар желісі 24%-ға қысқарып, ал тәрбиеленушілер саны 54%-ға азайды.
Отбасылық тәрбиелеу формаларына көшу қорғаншылық және қамқоршылық органдары жұмысының сапасын арттыруды талап етіп, олардың қызметкерлер саны 303-тен 1028 маманға дейін өсті.
2025 жылдан бастап заңды өкілдерді іріктеу талаптары күшейіп, қамқоршылар жыл сайын кешенді тексеруден өтеді. Тексеру табыс көздерін, денсаулық жағдайын, тұрғын үй жағдайын және соттылықтың болмауын қамтиды. Тәуекел факторлары анықталған жағдайда қамқоршылық міндетінен шеттету қарастырылған.
Балаларды қолдаудың баламалы тетігі ретінде тәлімгерлік институты да дамып келеді: 20 өңірде 360-тан астам тәлімгер жұмыс істейді, ал былтырдан бастап тәлімгерлерге міндетті кәсіби сертификаттау енгізілді. Балаларды орналастыруда ең алдымен туыстық байланыстар сақталады.
Қазіргі таңда елімізде жетім және ата-анасының қамқорлығынсыз қалған 20 798 бала бар, олардың 82%-ы отбасыларда тәрбиеленуде.
