Энергетика министрлігінің мәліметінше, 26 қаңтарда екінші буын зауыты іске қосылды. Қазіргі уақытта ол Королев кен орнынан жеткізілген шикізатпен жұмыс істеп жатыр, деп хабарлайды QazMonitor.
Тәуліктік беру көлемі шамамен 2,5 мың тоннаны құрайды, жобалық көрсеткіштерге шығу үшін мұнай мен газ ағындарын кезең-кезеңімен арттыру жұмыстары жүргізілуде.
Теңіз кен орнында персонал мен техниканы толық жұмылдыру жүзеге асырылуда. Мамандар энергетикалық нысандар мен электрмен жабдықтау жүйелерін тексеріп, олардың қауіпсіз жұмыс істейтіні расталды. Өндіруді қайта бастау жақын арада жоспарланып отыр. «Теңізшевройл» компаниясына өнеркәсіптік қауіпсіздік талаптарын сақтай отырып, өндірісті қалпына келтіруді жеделдету тапсырылды.
2 ақпанға келесі кезең – компрессор мен төрт трансформаторды пайдалана отырып, қысымды арттыру жүйелерін іске қосу жоспарланған. Бұл шикізатты технологиялық желілер кешеніне және Екінші буын зауытына тұрақты жеткізуді қамтамасыз етеді.
Энергетика министрлігі мен «ҚазМұнайГаз» жұмыстарды үйлестіріп, жағдайды тұрақты түрде бақылауда ұстап отыр. Орындардағы бақылауды ведомство мен ұлттық компания басшылығы жүзеге асыруда.
