Жаңа білім беру нысандарын пайдалануға беру Арнайы мемлекеттік қор, Білім беру инфрақұрылымын қолдау қоры, жергілікті бюджет қаражаты және жеке инвестициялар есебінен жүзеге асырылады, деп хабарлайды QazMonitor.
Мектептердің басым бөлігі Астана, Шымкент қалаларында, сондай-ақ Ақтөбе облысы, Атырау облысы, Шығыс Қазақстан облысы, Жамбыл облысы, Жетісу облысы, Батыс Қазақстан облысы және Түркістан облысы аумақтарында салынуда.
1000 заманауи пәндік кабинет
Білім сапасын арттыру мақсатында химия, физика, биология, робототехника және STEM бағыттары бойынша 1000 заманауи пәндік кабинет сатып алынып, орнатылуда. Соңғы үш жыл ішінде 4320 пәндік кабинет білім беру ұйымдарына жеткізілген.
1300 мектепті реновациялау
Мемлекет басшысының тапсырмасына сәйкес, 2029 жылға дейін 1300 мектепті, оның ішінде ауылдық жерлердегі 900 білім беру нысанын жаңғырту көзделген.
Бағдарлама аясында мектептерге күрделі жөндеу жүргізу, заманауи пәндік кабинеттермен жабдықтау, жиһаздарды жаңарту, кітапхана мен асханаларды модернизациялау, спорт залдарын салу немесе қайта жаңарту, қоғамдық кеңістіктерді абаттандыру және қауіпсіздік жүйелерін орнату қарастырылған.
Өткен жылдың қорытындысы бойынша 209 мектепте жөндеу жұмыстары аяқталса, 2026 жылы тағы 98 мектепте реновация жалғасуда.
2025 жылдың қорытындысында 236 мыңға жуық оқушы орнына арналған 162 мектептің құрылысы аяқталды. Жалпы алғанда, соңғы үш жыл ішінде 746 мың оқушы орнына есептелген 584 мектеп пайдалануға берілді.
