Еңбек министрлігі әлеуметтік желілерде тараған «төлем алу схемасының» заңға қайшы екенін ескертіп, азаматтарды сақ болуға шақырды, деп хабарлайды QazMonitor.
Мұндай хабарламалардың авторлары азаматтарға алты ай бойы төлем алу үшін мансап орталығында жұмыссыз ретінде тіркелуді ұсынады.
ҚР Еңбек және халықты әлеуметтік қорғау министрлігі бұл «схеманың» заңды негізі жоқ екенін және ол азаматтарды жаңылыстыратынын ресми түрде түсіндірді.
Министрлік әлеуметтік төлемдерді алу мақсатында әдейі жалған мәліметтер беру алаяқтық ретінде бағалануы мүмкін екенін ескертеді. Сонымен қатар осындай жалған нұсқаулықтарды тарататын тұлғалар да жауапкершілікке тартылуы ықтимал.
Осыған байланысты министрлік азаматтарды мессенджерлер мен әлеуметтік желілердегі бейтаныс адамдарға сенбеуге, жеке деректерін бөгде тұлғаларға бермеуге және ақпараттың тек ресми көздерін пайдалануға шақырады.
Әлеуметтік қолдау шаралары туралы толық ақпарат enbek.gov.kz сайтында, министрліктің әлеуметтік желілердегі ресми аккаунттарында, сондай-ақ 1414 нөмірі бойынша байланыс орталығы арқылы қолжетімді.
