Астананың Қоршаған ортаны қорғау және табиғатты пайдалану басқармасы дезинсекциялық маусымға дайындықты бастап, маса мен шіркейге қарсы аумақтарды өңдеу жоспарын таныстырды, деп хабарлайды QazMonitor.
Биыл дезинсекциялық жұмыстар алты кезең бойынша жүргізіледі. Қазіргі уақытта қала аумағында энтомологиялық мониторинг басталған — су қоймалары жәндіктердің дернәсілдеріне тексерілуде.
Ветеринария және фитосанитария бөлімінің басшысы Азат Тұрапбаевтың айтуынша, дайындық жұмыстары алдын ала басталған және қазір мамандар белсенді зерттеу жүргізіп жатыр.
«Қазіргі таңда Астананың барлық аумағында энтомологиялық зерттеулер жүргізілуде. Су қоймалары маса дернәсілдерінің бар-жоғына тексеріледі. Өңдеу жұмыстары сәуірдің екінші жартысынан басталады. Күн сайын шамамен 110–120 дезинсектор жұмылдырылады», – деді ол.
Алты кезеңнің әрқайсысы бірнеше сатыдан тұрады: алдымен су қоймалары өңделеді, кейін қаланың ашық аумақтарына көшу жоспарланған. Жұмыс орталықтан басталып, қала шетіне қарай жүргізіледі.
«Астаналық дезинфекция» ЖШС атқарушы директоры Алтынбек Мертасов негізгі дайындық жұмыстары аяқталғанын және мамандар іске кіріскенін айтты.
«2 сәуірден бастап шағын су қоймалары мен батпақты жерлерге энтомологиялық мониторинг жүргізе бастадық. Ғылыми топ тексерулер жүргізуде. Қазір техника, жабдық және персонал толық дайын. Су қоймаларында дернәсілдер анықталғаннан кейін өңдеу жұмыстары басталады. Одан кейін ашық аумақтарға — саябақтар, гүлзарлар, тұрғын үй алаптары мен жолдарға өтеміз», – деді ол.
Жұмыс барысында қолданылатын техника қатарында моторлы бүріккіштер, ыстық тұман генераторлары, дезинсекциялық машиналар, қайықпен өңдеуге арналған құралдар және агродрондар бар.
Мамандар өңдеу кезінде адамдар мен жануарларға қауіпсіз препараттар қолданылатынын, ал су қоймалары үшін экожүйеге зиян келтірмейтін биологиялық құралдар пайдаланылатынын атап өтті.
