Қазақстанда жол бойындағы сервисті дамыту аясында 2029 жылдың соңына дейін 60 заманауи нысан салу жоспарланып отыр. Жобаны көлік министрлігі жергілікті атқарушы органдармен бірлесіп, «PetroRetail» ЖШС-мен жүзеге асырып жатыр, деп хабарлайды QazMonitor.
Инвестициялық жоба аясында автожанармай құю және электр қуатымен зарядтау станциялары, қоғамдық тамақтану орындары, дүкендер, TIR тұрақтары мен қонақүйлер салынбақ. Бұл жол бойындағы қызметтердің сапасы мен қолжетімділігін арттырып, жүргізушілер мен жолаушыларға қолайлы жағдай жасауға мүмкіндік береді.
Жоба аясында іскерлік белсенділігі жоғары орталықтарда, қалаларда және туристік маңызы бар локацияларда қонақүйлер салу көзделген. Олар негізгі автомобиль бағыттары мен перспективті туристік маршруттар бойындағы инфрақұрылымды толықтыруға тиіс.
Қазіргі уақытта 6 қонақүй пайдалануға берілді. Алғашқы нысандар 2025 жылғы 17 қыркүйекте Жамбыл облысының Меркі ауданында және 25 қарашада Қызылорда облысының Арал қаласында іске қосылды. Соңғы пайдалануға берілген қонақүй Қарағанды облысының Қарқаралы қаласында орналасқан. Ол 2026 жылғы 15 маусымда жұмысын бастады.
Осылайша, жол бойындағы сервис желісін дамыту тек автожанармай құю кешендерімен шектелмей, жол қозғалысына қатысушыларға қажетті толыққанды инфрақұрылым қалыптастыруға бағытталып отыр. Қонақүйлер, тамақтану орындары, дүкендер, тұрақтар мен электр зарядтау станциялары қауіпсіз әрі жайлы сапарға жағдай жасап, өңірлердегі іскерлік және туристік белсенділікті арттыруға ықпал етеді.
Қалған нысандар 2029 жылдың соңына дейін көлік қозғалысына деген сұраныс, туристік әлеует және өңірлердің әлеуметтік-экономикалық маңызы ескеріле отырып, кезең-кезеңімен салынады.
