ҚазҰУ мен Қытайдың Солтүстік-Батыс политехникалық университеті бірлесіп «Қазақстан – Қытай» наноспутнигін әзірледі. Наноспутник 13 желтоқсанда Бейжің уақыты бойынша сағат 09:08-де 530 шақырым биіктікте орбитаға шығарылды.
Ғарыштық құрылғы Ziwei Aerospace компаниясының «Диэр-5» аппараты арқылы «Куайчжоу-11» зымыран тасығышымен жеткізілді.
2024 жылы университеттер микроспутниктерді зерттеу бойынша бірлескен жұмыс жүргізу туралы келісімге қол қойды. Бұл келісім Қазақстан Президенті Қасым-Жомарт Тоқаев пен Қытай Төрағасы Си Цзиньпиннің ресми сапары кезінде бекітілген.
Наноспутник мақсаттарды тұрақты бақылауға алады, платформа бағдарын динамикалық қабылдайды және OpenHarmony жүйесі арқылы қашықтықтан зондтау кескіндерін автономды таниды.
Наноспутниктің артықшылықтары: жоғары экономикалық тиімділік, тұрақтылық пен дәл бағыттау, ориентация қателерін компенсациялау мүмкіндігі және деректерді жылдам жеткізу.
Жоба ҚазҰУ базасындағы СБПУ филиалы, «Бір белдеу – бір жол» бастамасы аясындағы зерттеу лабораториясы, Әуе-ғарыш институты және Икемді электроника зертханасының қолдауымен жүзеге асты.
Жобаның консультанты – академик Хуан Вэй, жетекшісі – профессор Юэ Сяокуй, орынбасары – ҚазҰУ профессоры Зәуре Рақышева. Зерттеу тобына Қазақстан мен Қытайдан 20-дан астам маман қатысты.
Жоба ғарышты зерттеуге, білікті мамандарды даярлауға және микроспутник арқылы Жерді қашықтықтан зерттеуге мүмкіндік береді.
Дереккөз: Ғылым және жоғары білім министрлігі
