Қазақстанда ақпараттық қауіпсіздік саласындағы мемлекеттік бақылау функциялары Ұлттық қауіпсіздік комитетіне (ҰҚК) берілді. Бұл туралы Мемлекет басшысы қол қойған жарлықта көрсетілгенін Ақорда баспасөз қызметі хабарлады.
Құжатқа сәйкес, бұрын Жасанды интеллект және цифрлық даму министрлігіне қарасты болған ақпараттандыру саласындағы мемлекеттік бақылауға қатысты өкілеттіктер, атап айтқанда ақпараттық-коммуникациялық инфрақұрылымның аса маңызды объектілерінің ақпараттық қауіпсіздігін қамтамасыз ету функциялары ҰҚК құзыретіне өтті.
Сондай-ақ Ұлттық қауіпсіздік комитеті беріліп отырған өкілеттіктер шеңберінде министрліктің құқықтары мен міндеттемелерінің құқықтық мирасқоры болып айқындалды. Жарлықта Үкіметке ҰҚК-мен бірлесіп, қажетті заңнамалық түзетулерді әзірлеу және құжатты іске асыру бойынша тиісті шаралар қабылдау тапсырылған.
Бұдан бөлек, ҰҚК Президенттің қарауына комитеттің ережесіне өзгерістер мен толықтырулар енгізу жөніндегі ұсыныстарды ұсынуы тиіс. Жарлықтың орындалуын бақылау Мемлекет басшысы Әкімшілігіне жүктелген.
