Өзбекстанның Ферғана мұнай өңдеу зауытында қазақстандық мұнайды өңдеу арқылы авиациялық жанармай – Jet A-1 және ТС-1 өндірісі басталды, деп хабарлайды Avianews.kz сайтына сілтеме жасап QazMonitor.
Алғашқы партия көлемі 35 000 тонна және ол 2025 жылғы 17 желтоқсанда KazTransOil компаниясынан жеткізілді. Жанармай жеткізілімдері 2026 жылы да жалғасады, ал жылдың соңына дейін жалпы көлем 500 000 тоннаға дейін жетуі мүмкін. Зауыт өкілдерінің мәліметінше, өңделген жанармай бастапқыда тек ішкі нарыққа арналған.
Жобаны Saneg JetWhites компаниясы жүзеге асырып жатыр және ол азаматтық авиация үшін өз жанармай базасын қалыптастыру стратегиясының бір бөлігі болып табылады. Мұнай өңдеу зауыты операторларының хабарлауынша, зауыт жоспарланған қуатқа шыққанда ішкі нарықтағы авиациялық керосин сұранысының 70–80%-ын қамтамасыз ете алады.
Айта кетейік, Өзбекстан ресми түрде Jet A-1 авиациялық жанармайының сериялы өндірісін Ферғана мұнай өңдеу зауытында 2025 жылғы 6 тамызда бастады. Бастапқы кезеңде айына 10 мың тоннаға дейін өнім шығарылады, ал алдағы уақытта бұл көрсеткіш 20–25 мың тоннаға дейін ұлғайтылады. 2030 жылға қарай өндіріс көлемі жылына 500 мың тоннаға жетуі мүмкін.
