Торайғыров университеті британдық жетекші ғылыми орталықтармен бірлескен археологиялық және климаттық зерттеулерге кірісті. Жоба Ғылым комитетінің гранттық қаржыландыруы аясында жүзеге асырылып жатқан «Қазақстандық Ертіс өңірінің кейінгі қола дәуірі» бастамасы және European Research Council қолдауымен іске асатын DREAM (UCL) халықаралық жобасы шеңберінде қолға алынған, деп хабарлайды QazMonitor.
Ғылыми ынтымақтастық аясында университеттің Ә.Х.Марғұлан атындағы Археологиялық зерттеулер орталығына University College London және University of Cambridge жанындағы Макдональд атындағы археологиялық зерттеулер институтының ғылыми қызметкері, PhD Ребекка Робертс арнайы сапармен келді. Бұл сапар Қазақстан мен Ұлыбритания арасындағы археология және палеоклиматология бағытындағы стратегиялық әріптестікті жаңа деңгейге шығарды.
Бірлескен жұмыстың негізгі мақсаты – Павлодар облысы Аққулы ауданындағы Борлы көлінен түптік шөгінділердің сынамаларын алу. Алынған үлгілер голоцен дәуіріндегі климаттық ауытқулардың динамикасын қайта құруға және олардың ежелгі қауымдардың шаруашылық жүйесіне, қоныстану үлгісіне әсерін талдауға мүмкіндік береді.
Зертханалық талдаулар Қ.И.Сәтбаев атындағы Геологиялық ғылымдар институты базасында жүргізіледі. Бұл ғылыми нәтижелердің халықаралық стандарттарға сәйкестігін және зерттеудің сапалық деңгейін қамтамасыз етеді.
Алдағы кезеңде тараптар жетекші халықаралық ғылыми журналдарда бірлескен жарияланымдар әзірлеуді, деректер алмасуды және Орталық Азия археологиясы мен климатологиясы бойынша жаңа жобаларды іске қосуды жоспарлап отыр.
