Елордада 21-22 наурыз күндері «Қыпшақ қызы Аппақ» ұлттық операсының әлемдік премьерасы өтеді, деп хабарлайды QazMonitor «Астана Опера» театрының баспасөз қызметіне сілтеме жасап. Қойылым Тәуелсіздіктің 35 жылдығына арналып, Ұлыстың ұлы күні қарсаңында көрерменге ұсынылғалы отыр.
Опера заманауи қазақстандық композиторлар Серікжан мен Әліби Әбдінұровтардың музыкасына жазылған. Либреттосының авторы – Тілеуғазы Бейсембек. Шығармада бір-бірімен астасқан екі желі көрініс табады: ұлы ақын Низами Гәнжауи мен қыпшақ аруы Аппақтың махаббат хикаясы және соғыстың зардабын бейнелейтін қатал эпос.
Опералық пайымдауда жеке драма халықтық трагедия деңгейіне көтеріледі. Сатқындық, айла-шарғы мен шайқастар арқылы өрбитін оқиға желісінде Аппақтың даналығы, туған даламен байланысы және махаббаты тығырықтан шығудың символына айналады. Осылайша екі жастың тағдыры бейбітшілікке үндейтін рухани гимн ретінде ұсынылады.
Халықаралық шығармашылық топ
Ауқымды спектакльді сахналау үшін жоғары кәсіби команда жұмылдырылған. Қоюшы дирижер – Қазақстанның халық әртісі А. Мұхитдин. Дирижерлер – Р. Баймурзин және Қазақстанның еңбек сіңірген қайраткері Е. Ахмедьяров.
Қоюшы режиссер – Татарстан Республикасы Мемлекеттік сыйлығының лауреаты Михаил Панджавидзе. Бас хормейстер – Қазақстанның еңбек сіңірген қайраткері Е. Дәуітов. Сондай-ақ қойылымның көркемдік безендірілуіне Қазақстанның еңбек сіңірген қайраткерлері П. Драгунов пен С. Тасмағамбетова атсалысуда.
Режиссер: «Бұл – еркін қиял мен жанр заңдылығының үйлесімі»
Премьера қарсаңында Михаил Панджавидзе шығармамен жұмыс істеу үдерісі туралы ой бөлісті. Оның айтуынша, шығармашылық топ түпнұсқа драмадан сәл алшақтап, еркін интерпретацияға жүгінген.
«Опера іс-әрекетті, құштарлықты талап етеді. Ал құштарлық махаббатта, шытырман оқиғада, сатқындықта көрінеді. Жанр заңдылығын айналып өту мүмкін емес», – дейді режиссер.
Сондай-ақ ол кейіпкерлерді «жағымды» және «жағымсыз» деп біржақты бөлуден бас тарту маңызды болғанын атап өтті. Қойылымда әр образдың өз шындығы мен ішкі драмасы ашылмақ.
Режиссердің сөзінше, бұл – ағайынды Әбдінұровтардың алғашқы көлемді еңбегі. Музыкалық материал кәсіби деңгейде жазылғанымен, ендігі маңызды кезең – оны сахна кеңістігінде толыққанды өмірге енгізу.
Михаил Панджавидзе үшін Қазақстан екінші шығармашылық отанына айналған. Ол әр премьераны «алхимияға» теңеп, «Астана Опера» ұжымымен бірлескен жұмыс әрдайым үлкен жауапкершілік екенін атап өтті.
