Қазақстандағы премьера қарсаңында Cirque du Soleil командасы дайындығын пысықтады, Цирк ұжымы арнайыжурналистерге репетиция барысын мен әйгілі қойылымға қалай әзірленіп жатқанын көрсетті, деп хабарлайды QazMonitor.
«Cirque du Soleil 1984 жылы Канадада құрылған. Сол уақыттан бері біздің мақсатымыз – көрермендердің қиялын оятып, ерекше әсер сыйлау. Қазақстанға бұған дейін 2017 жылы келгенбіз. Ал биыл ел көрермендері бұрын-соңды тамашаламаған OVO қойылымын алып келдік», – деді OVO шоуының ресми өкілі Жани Малле жүргізді.
OVO – жәндіктер әлемі арқылы баяндалатын ерекше оқиға. Сахнада көбелектер, құмырсқалар, шегірткелер, өрмекшілер, қоңыздар және басқа да ұсақ тіршілік иелері тіріліп кеткендей әсер қалдырады. Олардың оқиғалары арқылы махаббат, достық, өзгеріс пен бір-бірімен үйлесімді өмір сүру тақырыптары көрініс табады. Қойылымға қатысатын 53 әртістің барлығы түрлі жәндіктің бейнесін сомдайды. Қазақстанға шоу құрамындағы әртістер мен техникалық мамандардан тұратын 100 адамдық халықаралық команда келді.
OVO қойылымының режиссері әрі хореографы – бразилиялық өнер қайраткері Дебора Колкер. Оның шығармашылық қолтаңбасы қойылымның барлық бөлігінен байқалады: бразилиялық әуендерге негізделген музыкадан бастап, жарқын костюмдерден, сахналық пластикадан және декорация шешімдерінен анық көрінеді.
«Cirque du Soleil костюмдерінің барлығы Монреальда тігіледі. Компанияның бас кеңсесінде шамамен 200 маман тек костюм әзірлеумен айналысады. Әр костюм нақты бір әртіске және оның өнер көрсету ерекшелігіне қарай жеке дайындалады. Әуе гимнастарына, акробаттарға, клоундарға арналған киімдер тек сыртқы келбетімен ғана емес, құрылымымен де ерекшеленеді», – деді Жани Малле.
Гастроль кезінде костюмдердің жағдайын бес маман қадағалайды. Бір ғана қойылымда шамамен 800 костюм элементі пайдаланылады. Астанадағы қойылымға, мамандарға шамамен 2400 костюм элементін дайындауға тура келген.
Шоудың ауқымы логистикадан да байқалады. Барлық жабдықты тасымалдау үшін 21 жүк көлігі немесе екі жүк ұшағы қажет болған.
Команда өзімен бірге кір жуатын жабдықтарын да алып жүреді: бес кір жуғыш машина және үш кептіргіш. Астанадағы премьераға дайындық барысында 60 рет кір жуылған. Әр көрсетілімнен кейін тағы 12–15 жуу циклі орындалады. Соның арқасында жүздеген костюм үнемі мінсіз күйде сақталады.
Айта кетейік, OVO – Cirque du Soleil-дің ең танымал қойылымдарының бірі. Оны әлем бойынша 10 миллионнан астам көрермен тамашалаған. Сондай-ақ бұл – компанияның 2017 жылдан бері Орталық Азияға алып келген алғашқы ірі жобасы. Қойылым цирк өнерін театрмен, музыкамен, акробатикамен және визуалды шешімдермен ұштастырады. Сондықтан оны балалар да, ересектер де қызыға тамашалай алады.
OVO қойылымдары Астанада 4–7 маусым аралығында Barys Arena кешенінде өтеді. Одан кейін шоу алғаш рет Алматыға барып, 11–14 маусым күндері Almaty Arena сахнасында көрсетіледі. Қазақстан бойынша барлығы 14 қойылым жоспарланған. Ұйымдастырушылар болжамынша, оларды 70 мыңнан астам көрермен тамашалайды.
