Қарағанды облысының мәдениет, архивтер және құжаттама басқармасының бастамасымен Ұлттық домбыра күніне орай ұйымдастырылған DOMBYRA UNITY халықаралық онлайн-челленджі әлемнің әртүрлі елдеріндегі қазақ музыкалық өнерін сүйетін жандарды бір алаңға біріктірді, деп хабарлайды QazMonitor.
Жоба алғашында Қарағанды облысы өнерпаздары мен домбыра өнеріне қызығушылық танытатын шетелдік орындаушылардың қатысуымен өтетін халықаралық шығармашылық акция ретінде жоспарланған. Алайда бастамаға деген қызығушылық күткен деңгейден әлдеқайда жоғары болды.
Бүгінде челленджге Нидерланд, АҚШ, Бельгия, Швеция, Өзбекстан және өзге де елдердің қатысушылары қосылған. Сонымен қатар әлемнің түрлі құрлықтарынан жаңа өтінімдер келіп түсіп жатыр.
Қарағанды облысы мәдениет, архивтер және құжаттама басқармасы басшысының орынбасары Айжан Шәкенованың айтуынша, жобаның халықаралық деңгейде кең таралуы күтпеген нәтиже болған.
«Біз жобаның халықаралық деңгейде қолдау табатынына сендік, бірақ оның географиясы осыншалықты кең болады деп ойламадық. Әсіресе Нидерланд, АҚШ, Бельгия және Швеция секілді елдердің белсенді қатысуы ерекше қуантады. Қазір әлемнің түкпір-түкпірінен бейнежазбалар келіп түсіп жатыр. Бұл жоба адамдардың қызығушылығын тудырғанын көрсетеді. Челлендж 5 шілдеге дейін жалғасады», – деді ол.
Челлендж аясында қатысушылар домбырада қазақтың халық күйлерін орындайды және Ұлттық домбыра күніне арналған бейнеқұттықтауларын жолдайды. Барлық материалдар әлеуметтік желілерде #DombyraUnity2026 және #ДомбыраКүні2026 хэштегтерімен жарияланып жатыр.
Жобаның негізгі мақсаты – Қазақстанның ұлттық музыкалық мұрасын кеңінен насихаттау, әлем жұртшылығын күй өнерімен таныстыру және әртүрлі елдердің тұрғындарын домбыра мен қазақ мәдениетіне деген ортақ қызығушылық аясында біріктіру.
