Шығыс Қазақстан облысының Катонқарағай ауданында өткен «Алтай – түркі әлемінің алтын бесігі» халықаралық фестивалі мәресіне жетті. Ауқымды мәдени шараға Қазақстаннан және бірқатар түркі мемлекеттерінен келген өнерпаздар қатысып, гала-концертті 50 мыңға жуық көрермен тамашалады, деп хабарлайды QazMonitor.
Фестиваль аясында Қазақстанның Халық әртісі Димаш Құдайбергенмен қатар Түркия, Өзбекстан, Әзербайжан, Қырғызстан, Мажарстан, Моңғолия, Башқұртстан, Тыва және Қарақалпақстаннан келген шығармашылық ұжымдар мен өнерпаздар өнер көрсетті.
Бағдарлама ұлттық спорт түрлерінен өткен жарыстарды, театрландырылған қойылымдарды және қазақ халқының салт-дәстүрі мен ұлттық құндылықтарын насихаттауға арналған мәдени іс-шараларды қамтыды. Фестиваль күндері Алтай өңірі түркі халықтарының рухани байланысын нығайтатын халықаралық мәдени алаңға айналды.
Ұйымдастырушылардың айтуынша, халықаралық фестиваль өңірдің туристік тартымдылығын арттыруға, сондай-ақ Шығыс Қазақстанның тарихи-мәдени мұрасын шетелдік қонақтарға кеңінен таныстыруға мүмкіндік берді.
