Қытайдың Ханчжоу қаласындағы Чжэцзян провинциялық музейінде Қазақстан Республикасы Ұлттық музейінің «Ұлы дала көшпелілерінің мәдениеті» атты көрмесі салтанатты түрде ашылды, деп хабарлайды QazMonitor.
Экспозицияға Қазақстан аумағын мекендеген ежелгі және ортағасырлық көшпелі халықтардың тарихы мен мәдениетін танытатын 279 бірегей археологиялық жәдігер қойылған. Ашылу рәсіміне Қазақстанның Шанхайдағы Бас консулы Нұрлан Аққошқаров, Ұлттық музей басшылығы, Қытай музейлерінің директорлары, ғалымдар мен археологтар қатысты.
Көрме үш тақырыптық бөлімнен тұрады. Онда қола дәуірінен бастап орта ғасырға дейінгі кезеңді қамтитын зергерлік бұйымдар, қару-жарақ, еңбек құралдары, керамика, торевтика және мата үлгілері ұсынылған. Экспозиция сақ, үйсін, ғұн, қаңлы және түркі тайпаларының мәдениетін, сондай-ақ Ұлы Жібек жолы бойындағы қалалардың даму тарихын қамтиды.
Көрменің басты экспонаттарының қатарында Есік қорғанынан табылған «Алтын адамның» реконструкциясы, Қаңлы мемлекетінің ақсүйек әйелі мен ғұн жауынгерінің бейнелері бар. Сондай-ақ Шілікті қорғанынан, Жалаулы және Қарғалы қазыналарынан табылған алтын бұйымдар, Арыс өзені аңғары мен Күлтөбе қалашығынан алынған археологиялық олжалар, XIII–XIV ғасырларға жататын жібек маталар көрермен назарына ұсынылған.
Көрменің ашылуы аясында Қазақстан Республикасының Ұлттық музейі мен Чжэцзян провинциялық музейі ынтымақтастық туралы меморандумға қол қойды. Құжат бірлескен ғылыми зерттеулер жүргізуді, Ұлы Жібек жолы ескерткіштерін зерделеуді, тәжірибе алмасуды және археологиялық экспедициялар ұйымдастыруды көздейді.
Жоба Қазақстан мен Қытай арасындағы мәдени ынтымақтастық аясында және екі ел арасындағы дипломатиялық қатынастардың 35 жылдығына орай ұйымдастырылды.
«Ұлы дала көшпелілерінің мәдениеті» көрмесі Чжэцзян провинциялық музейінде 2026 жылдың 11 қазанына дейін жұмыс істейді.
