Астанада кино, комикс, бейнеойын және аниме жанкүйерлерін біріктіретін ең ірі поп-мәдениет фестивалі – Comic Con Astana 2026 басталды. Биыл ауқымды іс-шара бірден екі алаңда – «Барыс Арена» мен «Алау» мұз сарайында өтіп жатыр, деп хабарлайды QazMonitor елорда әкімдігінің баспасөз қызметіне сілтеме жасап.
«Барыс Аренада» негізгі сахналық бағдарлама ұйымдастырылса, «Алау» мұз сарайында көрме аймағы орналасқан. Төрт күн бойы келушілерді халықаралық хедлайнерлермен кездесулер, қолтаңба сессиялары, косплей байқауы, музыкалық және би қойылымдары, интерактивті алаңдар, тақырыптық стендтер мен фестиваль жәрмеңкесі күтеді.
Фестивальдің алғашқы күнінде қонақтар Pop Asia сахнасындағы шығармашылық ұжымдардың өнерін тамашалай алады. Сонымен қатар әуесқойлар арасындағы ересектер мен балаларға арналған косплей байқауы, концерттік бағдарлама және арнайы қонақтармен кездесулер өтеді. Күннің басты оқиғаларының бірі – Comic Con Astana 2026 фестивалінің ресми ашылуы.
Comic Con Astana қазіргі поп-мәдениет жанкүйерлерімен қатар суретшілерді, дизайнерлерді, косплейерлерді, музыканттарды, би ұжымдарын және түрлі шығармашылық жобалардың авторларын біріктіреді. Көптеген қатысушылар үшін фестиваль өз жұмыстарын көпшілікке таныстырып, пікірлес қауыммен тәжірибе алмасуға мүмкіндік береді.
Фестивальдің басты оқиғаларының бірі дәстүрлі түрде косплей байқауы саналады. Қатысушылар өз қолдарымен жасаған фильм, сериал, бейнеойын, комикс және аниме кейіпкерлерінің образдарын көпшілік назарына ұсынады.
Comic Con Astana 9 тамызға дейін жалғасады. Алдағы күндері халықаралық жұлдыздармен кездесулер, қолтаңба сессиялары, байқау бағдарламалары, тақырыптық алаңдар және заманауи поп-мәдениет жанкүйерлеріне арналған өзге де іс-шаралар өтеді.
Еске салайық, бұған дейін Астанада 106 елден келген 500-ден астам жас зерттеуші жасанды интеллект бойынша IOAI-2026 халықаралық олимпиадасына қатысу үшін бас қосқаны хабарланған.
