Маскат Корольдік опера театрында Ролан Петидің «Коппелия» балеті сахналанды. Оман тарапынан арнайы шақыру алған «Астана Опера» труппасы көрерменге жоғары деңгейдегі орындаушылық шеберлігін көрсетті.
Екі күн ішінде қойылымды екі мыңнан астам адам тамашалады. Маэстро Руслан Баймурзин жетекшілік еткен оркестр спектакльдің драматургиялық желісін тереңдетіп, әсерлі музыкалық атмосфера қалыптастырды.
Омандық өнерсүйер қауым мен шетелдік қонақтар қазақстандық труппаның өнерін жоғары бағалады. Олар орындаушылық дәлдік, артистердің айқын образ жасауы және ансамбльдің мінсіз үйлесімін атап өтті. Маскаттық көрермендердің бірі қойылымды «сирек кездесетін пластика мен жоғары кәсіби шеберліктің үйлесімі» деп бағалап, жетекші солистердің өнерін «толыққанды үйлесім әсерін берген» деп сипаттады.
Гастрольдердің табысты өтуіне балет труппасының көркемдік жетекшісі Алтынай Асылмұратованың еңбегі ерекше үлес қосты. Педагогтар мен репетиторлардың жүйелі дайындығының арқасында «Астана Опера» өз орындаушылық мектебін дамытып, репертуарлық саясатында биік кәсіби талап пен бірізділікті тұрақты түрде ұстанып келеді.
Дереккөз: ҚР Мәдениет және ақпарат министрлігі
