Қазақстанның Ғылым және жоғары білім министрлігі Google компаниясының өкілдерімен келіссөз жүргізіп, жасанды интеллект негізіндегі білім беру құралдарын енгізу мүмкіндіктерін талқылады, деп хабарлайды QazMonitor.
Кездесу барысында Google білім беру үдерісін цифрландыруға бағытталған Google for Education бастамаларын таныстырды. Атап айтқанда, Gemini және NotebookLM сияқты заманауи жасанды интеллект құралдарын университеттерге енгізу мәселесіне басымдық берілді. Бұл шешімдер оқыту сапасын арттырып, студенттер мен оқытушылардың өнімділігін күшейтуге, сондай-ақ деректер қауіпсіздігін қамтамасыз етуге мүмкіндік береді.
Өз кезегінде министрлік цифрлық дағдыларды дамытуға бағытталған ұлттық бастамаларды ұсынды. Соның ішінде AI-Sana бағдарламасы аясында университеттерде жасанды интеллект шешімдерін енгізу, онлайн-курстарды дамыту және жүздеген мың маман даярлау жұмыстары жүргізіліп жатқаны айтылды.
Келіссөздерде Қазақстанды өңірлік академиялық хаб ретінде дамыту мәселесі де көтерілді. Бұл бағыт шетелдік студенттерді тартуды, жетекші халықаралық университеттердің филиалдарын ашуды және жаһандық ғылыми-білім беру ынтымақтастығын кеңейтуді көздейді.
Тараптар кездесу қорытындысы бойынша бірлескен білім беру және ғылыми жобаларды іске асыруға, сондай-ақ ынтымақтастық туралы меморандум жасасуға мүдделі екенін білдірді.
