2026 жылы 15-17 мамыр аралығында Barys Arena кешенінде халықаралық PGL Astana 2026 турнирі өтеді, деп хабарлайды QazMonitor. Осылайша Қазақстан астанасы қатарынан екінші жыл жаһандық киберспорт индустриясындағы ең беделді жарыстардың бірін қабылдайды.
Турнирді әлемдегі жетекші киберспорт ұйымдастырушыларының бірі — PGL Esports SRL өткізеді. Компания бұған дейін Стокгольм, Антверпен, Бухарест және Сингапур сияқты қалаларда ірі халықаралық жарыстар ұйымдастырған. Астанадағы турнирдің өткізілуі қаланың әлемдік киберспорт картасындағы орнын одан әрі нығайтады.
2026 жылғы додада 1,6 миллион АҚШ доллары көлемінде жүлде қоры сарапқа салынады. Турнирге әлемнің ең мықты 16 командасы қатысады. Қатысушылар қатарында Team Spirit және G2 Esports сияқты танымал ұжымдар бар.
Жарысқа халықаралық медиа және киберспорт индустриясының өкілдері де келеді. Қонақтар арасында Counter-Strike әлем чемпионы Дәурен Қыстаубаев, FURIA Esports ойыншысы Даниил Голубенко, танымал стример Слава Бустер, PGL турнирлерінің жүргізушісі James Banks, сондай-ақ Counter-Strike аңызы әрі әлем чемпионы Габриель Толедо бар.
2025 жылы өткен PGL турнирі ресми мейджор мәртебесіне ие болмаса да, ең ірі жарыстардың біріне айналды. Финалды Twitch платформасында бір мезетте 920 мыңнан астам көрермен тамашаласа, жалпы қаралым 1,3 миллионнан асты.
Оқиға тек киберспортпен шектелмей, қала экономикасына да айтарлықтай әсер етті. 2025 жылы турнирге шамамен 20 мың көрермен келіп, қонақүйлер, мейрамханалар және қалалық инфрақұрылымға түсетін жүктемені арттырды. Жалпы экономикалық әсері 11,6 миллион АҚШ долларына жуық болды.
PGL Astana 2026 турнирі киберспорттың жаһандық индустрия ретінде қарқынды дамып келе жатқанын көрсетеді. Сонымен қатар бұл оқиға Астананың халықаралық деңгейдегі ірі киберспорт жарыстарын өткізетін маңызды орталық ретіндегі мәртебесін одан әрі бекіте түседі.
