Қазақстанда креативті индустрия өкілдеріне арналған QazaqCreative бірыңғай цифрлық платформасы іске қосылды. Жоба ҚР Мәдениет және ақпарат министрлігінің қолдауымен Креативті индустрияларды дамыту қоры тарапынан жүзеге асырылды, деп хабарлайды QazMonitor.
Жаңа платформа авторлар, дизайнерлер, суретшілер, фотографтар, музыканттар, қолөнершілер, шығармашылық студиялар, продюсерлік орталықтар және креативті индустрия саласында жұмыс істейтін өзге де жеке және заңды тұлғаларға арналған.
Креаторлар www.qazaqculture.com порталындағы QazaqCreative бөлімі арқылы тіркеліп, жеке кабинет аша алады. Пайдаланушылар өз профилін жүргізіп, жобалары мен қызметтері туралы ақпарат жариялауға, мемлекеттік қолдау бағдарламаларына қатысуға өтінім беруге және жүйе арқылы хабарламалар алуға мүмкіндік алады.
Платформада гранттық бағдарламалар, жобаларды қаржыландыру тетіктері, білім беру және акселерациялық бағдарламалар, консультациялық, сараптамалық, ақпараттық және цифрлық қолдау құралдары туралы мәліметтер ұсынылған. Сонымен қатар пайдаланушылар байқауларға, питчинг сессияларына, форумдарға, көрмелер мен басқа да салалық іс-шараларға қатыса алады.
Тіркелу үшін www.qazaqculture.com порталындағы QazaqCreative бөліміне өтіп, тіркеу нысанын толтыру қажет. Модерациядан өткеннен кейін пайдаланушының жеке кабинеті ашылады.
Платформа тек креаторларға ғана емес, қазақстандық шығармашылық өнімдер мен қызметтерге қызығушылық танытатын азаматтарға да қолжетімді болады. Жоба креативті кәсіпкерлікті дамытуға, шығармашылық жобаларды қолдауға және Қазақстанның креативті экономикасының бәсекеге қабілеттілігін арттыруға бағытталған.
