Түркістан облысы полиция департаментінде ұшқышсыз ұшу аппараттарының операторларын даярлау және практикалық оқыту орталығы ашылды, деп хабарлайды QazMonitor.
Жаңа орталық полиция қызметкерлеріне заманауи технологияларды меңгеріп, дрондарды жедел-қызметтік жұмыстарда тиімді пайдалану дағдыларын жетілдіруге мүмкіндік береді.
Орталықтың ашылуы барысында мердігер компанияның мамандары арнайы жабдықтар мен симуляциялық кешеннің мүмкіндіктерін таныстырды. Қатысушылар ұшқышсыз ұшу аппараттарын басқару, ұшыру және қондыру бойынша практикалық жаттығуларды тамашалады.
Түркістан облысы ПД бастығының орынбасары Сейітжомарт Сейітхан оқу орталығының ашылуына үлес қосқан азаматтардың еңбегінің маңызын атап өтті. Орталықтың материалдық-техникалық базасын қалыптастыруға атсалысқан азаматтарға Түркістан облысы полиция департаментінің басшылығы атынан алғыс білдіріліп, бірқатарына арнайы марапаттар табысталды.
«Оқу орталығында Түркістан облысы ПД-нің жедел қызметтері, табиғатты қорғау полициясы мен патрульдік полиция бөлімшелерінің қызметкерлері оқытылып, олардың кәсіби даярлығын арттыруға бағытталған сабақтар тұрақты түрде жүргізілетін болады», - деді Сейітжомарт Сейітхан.
Жоба полиция қызметіне заманауи цифрлық технологияларды енгізіп, қоғамдық қауіпсіздікті қамтамасыз ету тиімділігін арттыруға бағытталған.
